Tura, May 5: Art & Culture Department aro Information & Public Relations Director-ni recommend ka•atani ja•man, A•chikrangoni jawilwat tarianio mingsing minggamako man•gipa aro dingtang dingtang award-rangko man•pilgipa Dominic Sangma-ko Cannes Film Festival-o bak ra•na biming seatgiminoniko den•gale watchanggalahani gimin Society of A•chik Film & Entertainment (SAFE), suk ong•gijaniko parakataha.
SAFE dolni Information & Public Relations Director-na sedoatgipa chittio parakatani gitade, Dominic Sangma-ba a•gilsak gimikni film industry-o saksa chu•sokgipa ong•e bang•en national aro international award-rangko man•ahachim indiba Cannes Film Festival 2023-na uko watchanggalaniara A•chik jatna aro a•dokni film industry-na dal•bea gimaani ong•aha.
SAFE-ni parakatani gitade, Dominic Sangma-ni kan•dikgipa ‘Karyukai Inc.’ jawilwatko 2010 bilsio Munich, Kosovo aro Venice songjinmarango ong•atanggipa international film festival-rango mesokahachim aro uni ‘Rong•kuchak’ jawilwatba 2014 bilsio ‘Best Student Film’-na National Award-ko man•e, dingtang dingtang national aro international film festival-rango mesokpilahachim.
Sangma-ni taridaldalgipa ‘Rapture’ jawilwatba Cannes-o La Fabriqe section-na seokako man•ahachim aro ia jawilwat minggnian international producer-rangni dakchakanichi tarichenggipa Meghalaya a•dokni Tribal jawilwatrangba ong•ahachim ine SAFE parakataha.
Iakoba poraie nina man·gen: Manipur-o jachange dongenggipa manderangko ‘special flight’-rango rimongkatbaenga
