Shillong, May 18: Meghalaya a•doko aro mongsongbate East Khasi Hills a•jao COVID-19-ko man•giparang salantian batrorobaengani gimin a•dok sorkari, East Khasi Hills a•ja gimikon lockdown-ko May 19 tarik attam 8:00 bajioni re•baenggipa May 31 tarik pring 5:00 bajiona ra•dodapattaiaha.
Meghalaya a•dokni Deputy Chief Minister Prestone Tynsong-ni u•iatani gitade, Meghalaya a•doko aro mongsongbate East Khasi Hills a•jao COVID-19-ko man•giparang batrorobaengani gimin sorkari, East Khasi Hills a•jao lockdown-ko May 31 tarikona ra•dodapatna tik ka•angaha.
Mongolbar salsani gisepon Meghalaya a•dok gimiko sak 906 manderang COVID-19-ko man•dapaha aro ia sak 906-oni sak 574-de East Khasi Hills a•jao ong•achim.
Mongolbar salo positive ong•gipa sak 906 manderangko channe da•o Meghalaya a•dok gimiko COVID man•e dongenggiparang sak 5,332 gapengaha aro ia sak 5,332-oni sak 3,076-de East Khasi Hills a•jao aro sak 674-de Ri Bhoi a•jao ong•enga.
Konta 24-ni gisepo sak 470-de ia COVID-19-oni nampilskana man•aha indiba Sombar aro Mongolbar salgnini gisepon gimik sak 19 manderang, a•doko COVID-ni a•sel siangskaaha.
Konta 24-ni gisepo COVID-ni a•sel sianggipa sak 19 manderangoni sak 17-de East Khasi Hills a•jao, saksade North Garo Hills-o aro saksade Ri Bhoi a•jaoni ong•a.
Indake ong•engon, Meghalaya a•dokni gipin a•jarangoba obostarangko niroke nangani kri ja•kurangko de•angchina sorkari, a•jatangtangni deputy commissioner-na ge•etaniko on•ataha ine a•dokni Deputy Chief Minister parakataha.
East Khasi Hills a•jao lockdown-ko May 31 tarikona ra•dodapattaiahani gimin chu•gimik lockdown-ko ja•rike manderang dongimin niamrangko ja•rikchina East Khasi Hills a•jani Superintendent of Police (SP) baksa nangrime kamko ka•china gita sorkari, East Khasi Hills a•jani Deputy Commissioner-na ge•etaniko on•ataha.
Lockdown-ni somoirango nokdang ge•antionan manderangni nangchongmotgipa bosturangko sokate on•na deputy commissioner kamko ka•anggen ineba Tynsong parakataha.
Lockdown-ni somoio Health department-ni tarisogimin program gita COVID-ni tikarangko su•angkugen aro tika su•na register ka•gimin manderang, niamo pangchake tikarangko su•angna man•aigen ineba Deputy Chief Minister parakataha.
