Shillong, April 11: Meghalaya a·doko re·anggipa chang assembly-na pu·onataniko dakna mikkang-mikkang gital political dolko songgitike susaanggipa Voice of the People Party (VPP)-ko India-ni Election Commission, adita sal skang Meghalaya a·dokni gital political dol ine ra·chakangaha.
Meghalaya-ni ge·gipin political dol ine ra·chakako man·na gita VPP dol, 1968 bilsio ge·etgimin, Election Symbols (Reservation & Allotment) Order-ni Para 6A-o pilak dongimin niamrangko aro ge·etanirangko chu·sokatna man·aha ine nikatna gita man·enga. Uano pangchakesa, Election Commission, Voice of the People Party (VPP)-ko Meghalaya a·dokni gital political dol ong·na gita ra·chakangaha, ine India-ni Election Commission-ni Secretariat-o Secretary-ni kamko jako ra·enggipa Pa Jaydeb Lahiri, mija April 10 tariko VPP-ni padotna chittiko seatgipao janapataha.
Meghalaya-ni ge·gipin political dol ine ra·chakangani ja·man, dolni gital symbol ba chinko Commission-chi ra·chakataniko dakna gita Commission-ni website-o indin on·enggipa symbol ba chinrangko namnikako basee ba uni a·palonikoba symbol-rangko noksa sale tarienba ge·gittam gital symbol-rangko ra·bae on·china gita India-ni Election Commission, VPP dolko didiangjolaha.
