25.2 C
Tura
spot_img

Farm law-rangko donkuchina ma•mong sorkariko Supreme Court ge•eta

Must read

Delhi, Jan 11: Sabisirang giproroengmiting somoio game ge•e cha•enggiparangni jingjengatengani gimin ma•mong sorkariko matnangatenba, game ge•e cha•enggipa manderangni jegalenggipa farm law ba gama ge•ani niamrangko donkuchina gita Sombar salo, Supreme Court ge•etaniko on•angaha.

Ia gital farm law-rangko jegale game ge•e cha•enggiparangni mol•molaniko aro Delhi-ni simarango jingjengatenggipani bidingo knatimangani ja•man raiko on•angengon, game ge•e cha•enggiparangni jingjengatani obostarang namjabatroroangengaha ine Supreme Court-ni Chief Justice of India (CJI) SA Bobde parakataha.

Iandake jingjengatanirangchi so•sojengjeng ong•atanirangko ra•baani cholrang donga ine janapatengon, kacharini gitade jingjengatanirangko champengna ge•etaniko on•jawa ine Justice Bobde parakataha.

Game ge•e cha•enggiparangni jingjengatanio sorkarini kam ka•anirangko Supreme Court suk ong•nikjaha ineba parakataha.

Sabisi giproroengmiting somoio mai dakgipa niamrangko done game ge•e cha•enggiparang jingjengatenga ine ma•mong sorkariko sing•doangengon, “Dolgnini gisepo mai songgigrikanirangko dakenga chinga ma•sija indiba chinga expert committee-ko songna nangnikenga. Da•o dipet ia farm law-rangko donkuchina chinga sorkariko nangnikenga aro ia niamrangko sorkari donkuna nangnikjaenga ong•ode chinga ia niamrangko dontongatskagen,” ine CJI Bobde, ma•mong sorkarina mikrakataniko on•angaha.

Ia niamrangko ra•gatna sikkelengani gimin ma•mong sorkariko sing•doangengon, “Game ge•e cha•enggiparangni jingjengatanirang salsabatroro namjabatroroengaha. Game ge•e cha•giparang sin•miting somoio a•palo asonge jingjengattokenga aro mitamrang an•tangtangko so•ote siengaha. Uamangna sawa cha•ani ringanirangko on•enga? Uamangni jingjengatanio saksa sakgipinoni chel•tanggrike dongtokengama? Maini gimin butchuma budeparangba iandake sin•miting somoio jingjengatna nangenga? Uamangna maiba ong•na nanggenchimode an•ching pilakan dai nanggiparang ong•gen. Chingni jako darangni an•chikoba nangja,” ine Supreme Court-ni CJI parakataha.

spot_img

More articles

spot_img
-->

Latest article