Williamnagar, Aug 8: India a•songni jakgitelaniko man•aoni bilsi 75 gapaniko maniani bak gita August 8 tariko Brigadier Deepak Gaur-chi dilenggipa army dol, Pa Togan Nengminja Sangma-ko gisik ra•e dongna bimang tarie donenggipa mangkrongona mande ra•aniko dakna Umroi-oni jinma bike-o Williamnagar-ni Chisobibra-ona sokbaaha.
Ia ‘Freedom Ride’ ba motorcycle-rangko sale re•jomaniara, dingtangmancha British-rangni sasononiko warachakna gita dakgrikdilanggipa Meghalaya a•dokni dilgiparangko man•chape a•songni jakgitelanina krengdilanggipa pagitcham ma•gitchamrangko mande ra•pilskana aro mittelpilskana miksonge Army Red Horns Division-ni ong•atenggipa ong•achim.
Uamangni sokbao, East Garo Hills District-ni Additional Deputy Commissioner, East Garo Hills ni Superintendent of Police Bruno A. Sangma, Loyola College-ni chatro chatrirang aro Pa Togan Nengminja Memorial Association-ni manderangba tom•anio dongpatokaha.
Ua somoio sokbagiparangoni, Pa Togan Nengminja-ni mangkrong tarigipa a•damo Azadi Ka Amrit Mahotsav aro Har Ghar Tiranga-ni bak gita a•songni nisanko songdoangaha.
Tom•anio sokbagipa officer-rangna Pa Togan Nengminza-ni itihasko Pa Togan Nengminza Memorial Association-ni manderang adita talate on•aniko dakangaha aro Army-rang songni manderang aro chatro chatri-rang baksa agangrike uamangna a•songni nisanrangkoba sualangaha.
