Tura, Dec 20: All Garo Hills Multipurpose Cooperative Society project-ko Sombar salo, Meghalaya a•dokni Chief Minister Conrad K Sangma, West Garo Hills a•jani Babadam songo a•bachengate on•angaha aro ia project-ko a•bachengate on•angani somoio North Tura-ni MLA Thomas A Sangma-ba dongpae bak ra•angaha.Ia project-ara, cooperative society-rangna training-rangko aro dingtang dingtang janggi tangani cholrangko on•na gita program-rangko ong•atna nokko rike on•ani project ong•enga aro iana sorkari, gong kror 4.44-ko hisape donenga. Ia gong kror 4.44-oni gong kror 3.30-kode a•dok sorkari, All Garo Hills Multipurpose Cooperative Society Ltd-na chamna gita songgigrikmanaha aro bangki gong kror 1.14-kode SFURTI cluster-oniko chimonge on•na tik ka•aha.Ia project-ko a•bachengate on•angani somoio a•dokni Chief Minister Conrad K Sangma, jinmana aganprakangengon, game ge•e cha•enggipa manderangni namgnina sorkari, on•kange kam ka•enga aro dingtang dingtang dolrangni nangrime kam ka•anichi, wak jilani, dudni bosturangko tariani aro do•o jilani kamrangko man•chape a•dok sorkarini a•bachengatgipa dingtang dingtang kamrangko chu•sokate on•anggen ine parakataha.Ia Multipurpose cooperative society-ara manderangni janggi tangani gadangko tang•doatan baksana dingtang dingtang cooperative society-rangna training-rangko on•na, kamrangko ka•anio jakkandilna aro bosturangko bazar antirangona sokatna gita dakchakanirangko on•gen ineba Chief Minister parakataha.Salgro salaram a•dokrangna gong kror 280-ni premier paramedical institute-ko Babadam-o kuligen aro iako ra•chakna gita India sorkari, da•o bon•kamgipa gadango ong•engaha ineba ia tom•anio Chief Minister parakataha.