Tura, June 21: Songo-noko janggi tangani cholrangko namdapatna aro mikkangchina nisigija pangkamgipa dakbewalko ra·gatna, Garo Hills-o skanggipa changna litre 20-ni botolo chipgimin ‘Nokrek Chi’-ko Sonibar salo West Garo Hills a·jani Sakal Aduma songo oprakaniko dakangaha.
Benitha Food and Beverages-ni a·bachengatgipa ‘Nokrek Chi’, Garo Hills-ni chubatgipa biap aro UNESCO Biosphere Reserve – Nokrek a·brioniko electric pumprang nanggija, jokonbagipa chi-ko chakrike rongtalgipa ringani chi-ko aro manderangna janggi tangani cholrangko on·na miksongenga.
Oprake on·aniko dakanio, sak 150 manderangna baten bak ra·aha aro uamangoni DCIC Tura-ni Functional Manager Sengchang T. Sangma, mongsonggipa sokgipa aro Nokma Denithson R. Marak mande ra·e okamako man·gipa ong·e re·baaha. Una agreba, Pamong Abhik D. Arengh, Rongkhon Parish-ni Father Bartholomeo Marak, aro North Garo Hills-ni Soil and Water Conservation-ni District officer Laren Pangkam D. Arengh ia tom·anio bak ra·aha.
Iako a·bachengataniara nangmiting somoio aro nangchongmotgipa kamko dakani ong·a, maina bang·bata litre 20-ni chi botolrangko a·dokni a·paloniko ra·baenga, aro ‘Nokrek Chi’ indake a·palchini chi-rangna pangchakaniko komiata baksana manderangna janggi tangani cholrangko on·gen aro biaptangni rongtalgipa, ringna namgipa chi-rangko manderangna on·gen ine Sengchang T. Sangma aganaha aro ia chi-ko bading-chiwalanio mikkangchi Garo Hills-ni a·palona sokangchina ine an·tangni nama skanikoba on·aha.
Ringna namgipa aro rongtalgipa chi-ko on·na gita, chi-ko botol-o chipna skang mikronchi nikna man·gijagipa moilarangko galna namedake chekani ba advanced filtration-ko daka.
Changsa jakkale galaigipa plastikrangko jabol ong·aoniko champengna ine ia chi-ko da·o dipet litre 20-ni botolrangosan man·ainga ine Benitha Food and Beverages-ni nokgipa Tengchi M. D. Arengh parakataha.
“Chinga mikkangchi nigrike, glas-ni botolrangkoba jakkalnaba donga. Nokrek-o rona re·baarango chi rongtala aro ringtoa ine nike anga iako dakna didianiko man·aha. Anga angni indake ringtote nikaniko apsandake Garo Hills-ni gipin manderangnaba on·na skaha,” ine ua aganaha.
Unbaksa uni co-proprietor Benitha G. Momin-ba, ‘Nokrek Chi’-ko a·bachengatanichi manderangna janggi tangani cholrangko on·na amani gimin janape, “Iano donggipa bang·a chadamberangan poraia-skia donga indiba janggi tangani cholrang dongja. Chinga Sakal Aduma-oni sakdok manderangko kamna rakkiaha. Iade a·bachenganisan ong·aia,” ine aganaha.
Bang·a botol-o chipe palgipa chi-rang ringtoja, aro manderangni tom·bimonganirango uarangko jakkalaniko nike dingtanganiko aro nambatgipa, songtang-noktangoniko chi-ko manderangna on·na skahani giminba ia chi-ko a·bachengataha ine, Plant Manager Benitho Sangma-ba aganaha.
Na·simang ia video-koba nina man·gen:
Na·simang iakoba poraina man·gen: Yoga mamung torom-ni bak ong·ja ine Megh’ Education Minister parakata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
