Shillong, May 22: Germany a•songo kam ka•na gita watatako man•na sienggipa chadamberangna German Language Training Program-ko Bristibar salo, Meghalaya a•dokni Chief Minister Conrad K Sangma, Shillong Tech Park-ko a•bachengate on•angaha.
Meghalaya a•dokni chadamberangko kam ka•e cha•na gita Japan aro Singapore a•songrangona watatanio chu•sokgipa ong•ahani gimin da•o a•dok sorkari, an•seng baljokani kamrango changgipa sapgipa chadamberangko Germany a•songona watatskana miksongenga aro iana dingtangmancha, Labour, Employment & Skill Development Department-ni ning•o, Meghalaya State Skill Development Society (MSSDS)-ni dakchakanichi a•dok sorkari, German Language Training Program-ko a•bachengataha.
Ia German Language Training program-ko a•bachengate on•anganio a•dokni Chief Minister aganprakatengon, Meghalaya a•doko chadamberangan jelbra jelsubatani gimin chadamberangko, dingtang dingtang a•songrangona kamrangko ka•na sorkari watatenga aro sak 30,000 chadamberangko, gipin a•songrangona watatna man•genchimoba japrakon gong crore 250-ko man•e bilsio gong crore 3000-kode ia chadamberangni nokdangrang man•sognok ine parakataha.
Gipin a•songrango kamrangko ka•e cha•na watatako man•enggipa chadamberangna pilak nanga dakchakanirangko on•gen ine ku•rachakaniko on•angengon, ia chadamberangna sorkari, naljokani aro pilak korosrangko on•esa gipin a•songrangona watatenga ine Sangma aganaha.
Skanggipa batch-ni candidate-rangkode ua an•tangan Germany a•songona re•dilanggen ineba Chief Minister, ku•rachakaniko on•angaha.
Iandake nangrime kam ka•anichi India aro Germany a•songni gisepo meli nangrimaniko bilakbatatna dakchakgen ineba ua an•tangni ka•dongchakenganiko parakataha.
Ia tom•anio, German Consulate Kolkata-oni re•bagipa Deputy Consul General Andrea Jeske-ba jinmana aganprakengon, an•seng baljokani a•bao kam ka•giparang Germany a•songo chu•ongjaenga aro 2035 bilsini gisepon kamni gimin skia man•gipa sak million 7 manderangko nanggnok ine parakatenba, da•alo ia program-ko Meghalaya-o ong•ataniara chadamberangni janggi tanganiko dingtangatna chol oe on•ani gita ong•enga maina ia chadamberang, Germany a•songo kamkosan ka•e dongaijawa indiba namroro silrorona, on•gilpana aro dal•rorona man•gnok ine aganaha.
Ia program-ni ning•o seokako man•gipa candidate-rang jadokna German ku•sikko skie ra•anggen aro uni ja•man, interview-rangko mikkangpae aro visa-rangko tarie Germany a•songni mingnamgipa sanram biaprango kamrangko ka•na re•chakatanggen.
Na·simang ia video-koba nina man·gen:
Na·simang iakoba poraina man·gen: Manipur-o konta 48-na bandh-ko ong•ata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
