Tura, August 23: Gabil Gare Mrenda Megam Megonggare Momin Mahari Association-ni (GGMMM) Rongkhon Unit uni bilsi 25 ong·aniko Sonibar salo Live Green Cottage Resort, Durama College Road, Rongkhon-o kusi ong·bee maniangaha. Ia silver jubilee-o, 2000 bilsio ia unit-ko a·bachengatani aro re·anggipa bilsi kolgrikbongani gisepo Rongkhon-ni manderangna dangdike on·anirangko gisik ra·atanirangko dakangaha.
Ia tom·anio mande ra·ako man·na kragipa Meghalaya Legislative Assembly-ni Speaker Thomas A Sangma mongsonggipa sokgipa ong·e re·baaha aro unbaksana mande ra·ako man·na kragipa Rambrai Jyrngam LA-ni MLA Remington G. Momin-ba dingtangmancha okamataniko man·e sokgipa ong·aha. Uamangni bakrimanichi, association-ni kam ka·anirangko mesokanio su·ubatataha.
Program-ni a·bachengo Rev. Rettiar G. Momin Nokgipako mitele bi·aniko dilangaha. Uni ja·mano GGMMM Jubilee Flag-ko songaha aro Jubilee Anthem-ko ring·e ku·cholsan nangrimaniko mesokaha aro rasong chaanian gapaha.
Uandake, Adrian G Momin rimchaksoani kattarangko agane, pilak bak ra·giparangko mitelaha aro Rongkhon Unit-ni ong·baaniko talatangaha. Mongsonggipa sokgipa aro gipin dilgiparangko mande ra·anirangko dake uamangni dakchakanina aro didianina mitelangaha. GGMMM-ni (Rongkhon Unit) President Luckinton G. Momin mongsonggipa agananiko dakaha, aro batanggimin bilsi 25-o chu·sokgiminrangko nipilate, mikkangchina niksamsoanirangko parakangaha.
“Chinga 2000 bilsio a·bachengaha aro da·alo chinga chingni ku·cholsan bakrimani aro dakbewalko ripingani bilsi 25 ong·aniko manienga. Mahari-an chingni bil ong·a – uan chingko kusini aro neng·nikani somoio nangrimata. Chingni chadamberangni gisik nange bak ra·aniko nike anga namen kusi ong·a. Uamangan chingni ong·baaniko mikkangchi ra·anggipa ong·a,” ine Luckinton G. Momin Hub News-na parakataha.
Uandake, abisa sakgittam chrok-mesae jatni dakbewalko dakmesokangaha aro uni ja·mano GGMMM, Tura-ni President Kenneth Smooth G. Momin jatna-a·songna ka·saani git-ko ring·achi parakangaha. SWGH Ampati-ni ADC Dolrich B. G. Momin-ba dingtangmancha agananiko dake an·tangni chanchianirangko parakangaha.
Ia program-ni mongsonggipa bak mingsara GGMMM-ni (Rongkhon Unit) mongsonggipa member-rangko, uamangni bimchipe aro rake kam ka·anina mande ra·aniko dakanian ong·a. Una agreba, bilsi 25-ko ong·aniko manianina dingtangmancha Jubilee Souvenir-ko oprake on·angaha.
Carine aro uni ripengrang chrok-mesaanirangko dake jattangni dakbewalrangko dakmesokangkuaha aro manderangko an·saoatangkuaha. Mande ra·ako man·e sokbagipa Remington G. Momin, jinmana an·tangni nama skaniko on·e, association-ko uni on·gilanirangna mitele aganangaha.
AMAAMMA-ni Secretary, Fralosh A. Momin, bakrimgimin mahari-rangni gisepo ku·mong-nangrimani gimin agan-talate on·angaha. GGMMM-ni Secretary, (Rongkhon Unit) Patrick Arengh, jubilee-ko manianio bakrimgipa aro on·gilgipa sakantinan mitelani kattarangko aganangaha.
Bon·kame, Chitang G. Momin nokgipa mitele tom·aniko matchotataha ao uni ja·mano Jubilee cake-ko rataha. Uni ja·mano cha·ani-ringanirangko ra·e manianirangko dakangkuaha aro manderangna saksa sakgipin baksa bakrimna aro an·sengna cholko on·angaha.
GGMMM Mahari Association-ni Rongkhon Unit, bakrimani, dal·roroani aro bak ra·gipa manderangni gisik nanganiko mesokaha. Iano batanggimin salrango chu·sokgiminrangkosan mania ong·aijaha indiba gital dake aro gisik nange mikkangchina re·mikkanganikoba nichaksoaha.
Na·simang iakoba nina man·gen:
Na·simang iakoba poraina man·gen: AIIMS Guwahati-ni Prof. B. K. S. Sanjay, salgro salaram jolrango nambata sanna bannaniko on·a niksamsoenganiko parakata
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
