Tura, April 15: Bristibar salo Garo Hills Autonomous Council (GHADC) eleksinni result-rangko pakatahaon, Indian National Congress (INC), Garo Hills gimiko bang·bate ge-12 seatrango cheahani gimin, Congress dolni agantimgipa Pa Zenith Sangma, Garo Hills-ni manderangko mittele aganaha.
Pa Zenith Sangma-ni aganani gita, GHADC-o gital Executive Committee (EC)ko rikna gita sak 3 mang chu·ongmanjaoba Congress dol baksa bakrime gital EC-ko rikna gisiko nanggipa Independent ba jakgitele susagipa candidate-rang aro gipin dolrang bakrimgenchimode Congress dol, GHADC-o gital EC-ko rikna ka·dongenga, indiba BJP baksa bakrime EC-ko rikjawa, maina Congress aro BJP dolni miksongani namen dingtanggrika ine Pa Zenith Sangma aganaha.
GHADC eleksinni ja·man EC-ko rikna kim·kim ong·ode, ku·monge kam ka·na nanga, maina an·tangtangna on·gimin daitorangko u·i-ma·sie a·dok-chigana jerangkon niamo pangchake dakna-ka·na nangachim uarangko chu·sokatna chinga ku·mongenga. Beben EC-ko rikna gita chingo memborrang chu·ongjaoba apsandake district council-o je obostarang ong·enga, an·ching sakantian u·ia ine anga bebera·a. Re·anggipa bilsi-gittamna batpile GHADC-o kam ka·giparang beton man·tokjaha aro GHADC-ni do·garangko chipe donenga.
Unbaksana, GHADC-ko da·o mamingnaba choligijagipa obostaona sokataha, uni gimin GHADC-ko rikpiltaina chinga ku·monganiko dakenga ine Congress dolni CLP dilgipa Dr Mukul Sangma aganaha.
