Shillong, Oct 13: Meghalaya a•doko National People’s Party (NPP)-chi dilenggipa Meghalaya Democratic Alliance (MDA) sorkarini kosako matnangrongengani gimin gipin dolrangko jaksi otna skang, an•tangtangan simsake dongchina gita Bristibar salo, ra•galako man•gipa Congress dolni MLA Ampareen Lyngdoh, All India Trinamool Congress (AITC)-na mikrakataniko on•angaha.
Lyngdoh-ni kobor ra•timgiparangna parakatani gitade, je biapon AITC ja•dil su•e dal•baahachim, ua biapon so•sojengjeng ong•anirangko nikna man•engachim.
“Uni gimin na•simang an•tangtangni biapon so•sojengjeng aro dingtang dingtang neng•nikanirangko namatna man•jaenga ong•ode gipin a•dokni dolko jaksi otna skang name simsakchengbo,” ine Lyngdoh aganaha.
Opposition dolrangde matnangtaitaie ronade man•aigen ine janapatengon, “Uni giminsa sawa maiko aganenga anga an•tangnade maming nangchakea dongja inenga. Gipinrang angni kamko jegitaba inchina anga an•tangde an•tangni kamkon ka•angaigen maina da•o namjabatgipa somoirang an•chingona sokbaengaha,” ine East Shillong-ni MLA aganaha.
AITC-ni iandake politics kal•aniara Meghalaya a•dokode cholijawa ineba Congress doloniko ra•gala man•gipa MLA Ampareen Lyngdoh parakataha.
“Uamangni iandakgipa kattarangchi uamang sako salna jotton ka•enga? Uamang an•tangtangni ska gita politics kal•aichina indiba Meghalaya a•dokode uamangni iandakgipa kamrangde cholijawa,” ine Lyngdoh aganaha.
