Shillong, Dec 12: Jawilwat tarianio boksis man·pilgimin Pradip Kurbah-ni gitalbatgipa jawilwat, Ha LyngkhaBneng – The Elysian Field-ko, Sukrobar salo St. Anthony’s College, Shillong-o wate mesokangaha. Ia jawilwatko mesokaniko Department of Mass Media, Kurbah Films, Hello Meghalaya aro Ka Knup Creatives dol gittam bakrime ong·atangaha.
“Pilak mandean jawilwatko niani dingtangmancha an·tangni bewal donga. Jawilwatko tarigipa ong·e ian angna mingsa namgni ong·a. Ian angna bang·a skie on·ani ong·a,” ine Pradip Kurbah an·tangni jawilwatni bidingo aganangaha.
“Anga namen kusi ong·a. Aro jawilwatko mesokengmitingo, ka·dingna nanggijagipa bakrangoba manderangni ka·dinganiko nike anga nawang chapilaha. Jawilwatko tarie manderangni mesokchengon, anga uamangko re·bae nieaniko nangnika. Manderang namen gisik seng·a ine anga u·ia, OTT platform-rangni ong·baanichi uamang ia jawilwatko ra·chakgen ine anga ka·donga,” ineba ua agandapaha.
Ia jawilwato sakdok manderangni song damsao tom·tome janggi tangani – uamangni simbraani, mandeskarang baksa nangrimani aro janggi tangani dingtang dingtang obostarangni gimin mesoka.
Ia jawilwatko mesokaniona Social Welfare Department-ni Advisor Paul Lyngdoh re·bae bak ra·angaha. “Be·grunasienggipa songsarni jajrenganirangko ia jawilwato mesoka. Namedake niatgenchimode, da·ororo Meghalaya a·doko ong·enggipa obostarangko mesoka.”
“The Elysian Field-ara golpo agananisan ong·aija. Ian Khasi manderangni chanchibewalanio pangchake a·gilsako janggi tangani gimin an·chingni u·ia-ma·sianirangko mesokani ong·a. Ia jawilwato ong·chongmotgipa aro chanchichipgipa obostarangko donbrina, aro mandeni janggini nikgipa aro nikgijagipa biaprango songreanirangko mesoka. Jatni dakbewalko mande ra·a baksana a·gilsak gimiko u·ina altugipa bewalo golpo agananiko ia jawilwato dake mesokaha,” ine ia jawilwato kal·gipa mingsinggipa actor Melvin Mukhim 2022 bilsioni an·tangni ia jawilwato bak ra·ani gimin talate aganangaha.
Manderang ia jawilwatko uni dingtangmancha golpo aganani bewalna, saksan sikdikdik ong·ani, kenani aro siani, aro ka·dinganirangko mesokanina mitele aganangaha.
Bakrimgiparangoni dolsa ong·e, Hello Meghalaya! a·doko iandakgipa jawilwatrangko tarianirango dakchakanirangko on·enga. Uni grant programme-chi, jawilwat tarigiparangna Meghalaya-ni dakbewalrang, biaprang, aro ku·sikrangni bidingo golporangko bikote manderangna parakatna cholrangko on·enga.
A·dokni ma·manta daka-rikani bewalrang, nitogipa biaprang aro dingtang dingtang ku·sikrangni bidingo jawilwatrangko tarie a·gilsakni dingtang dingtang biaprangna mesokani gamchatako Meghalaya sorkari u·ia aro ra·chaka. A·doko jawilwat tarianirangko namdapatna, sorkari Hello Meghalaya OTT-gita jawilwat tarigiparangna lak ₹5-oni lak ₹35-ona kingking tangka-paisarangko on·e dakchakenga. Ia bilsio sak 48 jawilwat tarigiparangna ia grant-rangko on·angaha aro uamangni jawilwatrangko re·baenggipa jarangni gisepo jinmana mesokanirangko dakanggen.
Ha LyngkhaBneng – The Elysian Field — adita salrangna skang November 2025-o ong·atanggipa chang 31-gipa Kolkata International Film Festival-o (KIFF) Golden St. George-o Best Film, Best Director, Best Director award-ko man·angaha, aro 2025 Moscow International Film Festival-o NETPAC Award for Best Asian Film-ko man·angaha. Uni indake chu·sokanirang sorkarini dakchakaniko man·enggipa gipin jawilwat tarigiparangnaba didianiko on·gen ine ka·dongsoenga. A·dokni dakchakanichi tarigimin bang·a jawilwatrangko re·baenggipa jaarango manderangna mesokna oprake on·nasienga, uandake Meghalaya-o jawilwat tarianirango namdapanirangko nikna ka·dongsoenga.
Na·simang iakoba nina man·gen:
Na·simang iakoba poraina man·gen: Pakistani bobil dol baksa jak donga ine chanchichipe retired IAF Officer-ko rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
