Agartala, Dec 6: Tripura a·doko BJP dolna chakgiparang Biplab-ko ra·galchina ine BJP Tripura Unit-ni Prabhari Vinod Sonkar-ni re·bao jinma chrochro a·boke jegalaniko mesokaha.
Dec 6 tarikni robibal pring nangnang somoirango Pa Sonkar a·dokni BJP dilgiparangko aro dolna kam ka·giparangko State Guest House-o grongna tik ka·e donachim. Indake ong·genchimoba hajalni hajal BJP dolna chakgiparang State Guest House-ni mikkango tom·daksoe a·dokni skotong Minister ong·enggipa Pa Biplab Kumar Deb-ko ra·galchina ine jinma jinma ‘Biplab-ko ra·galbo BJP-ko naljokatbo’ ine a·boktokaha.
Indake skotong Minister Pa Biplab Deb-ko ra·galchina jegale chrik-a·bokaniko Tripura a·doko maming saloba nikujachim. Jensalo Vinod Sonkar State Guest House-oni ong·kate Krishna Nagar-o donggipa BJP office-na re·na ine gario gadona dakon uni gariko dongdule Biplab Deb-ko ra·galchina manderangni dongdikgija chrikwataniko jechakdamna man·jae Vinod Sonkar, anga iarangni bidingo pilak chakpaenggipa MLA-rang baksa golpochenggen ine agane donesa re·angna man·aha.
BJP dol jinmani kam ka·grimanichi aro chakgrimanichi rikgimin dolsa ong·a unigimin dolo donggipa pilakan chanchiatangko agana bil donga ine BJP-ni state office-o kobor ra·timgiparangnaba Pa Vinod Sonkar aganaha. Manderang inditan tom·aniko champengna police dol state guest house-ona re·angpilna nangao ga·akpilaha.
