Tura, Dec 6: West Garo Hills a•jani a•kawe jolo gimagipa mandeko police-rang, Robibar salni bako Banganggre minggipa songoniko jokatpilna man•aha.
West Garo Hills a•jani SP MGR Kumar-ni kobor on•ani gitade, Sonibar pringo West Garo Hills a•jao donggipa Bogularbita songni na•kam badinggipa mande saksa, jekon Sayful Islam mingachim, bia ka•gipa biap damsaona na•kam ra•angahachim indiba ua somoionin ua nokona re•bapiljahachim. Ja•mano ia mandeni jakkalgipa mobile nombor-onin sakgipin mandesa, ia mandeni ma•drangrangna phone ka•atenba, ia mandeko rim•gittangaha aro salgittamni gisepon gong lak 15 tangkarangko gamna nanggen ine u•iatahachim. Ia mande baksana uni jakkalenggipa AS-18 9854 bike-ba gimaahachim.
Ia a•selni bidingo FIR-ko man•soa bakan police-rang, dingtang dingtang biaprangona re•roroe, rim•gittanga man•gipa mande baksana ia mandeko rim•gittanggipa manderangko sandina a•bachengataha aro police-rangni sandiengako ma•sie ia mandeko rim•gittanggipa manderang, ia mandeko galenba ua biaponi kataha ine SP parakataha.
Ja•mano police-rang, ia mandeko Bogularbita outpost-ni ning•o donggipa Banganggre songonikon songni nokmani nok sambaoniko man•pilaha ine Police-rang u•iataha.
Ia mandeko rim•gittanganio jak donggipa manderangko rim•na gita police-rang sandiengaha ineba Kumar parakataha.
