Williamnagar, Jul 5: East Garo Hills a·jani Williamnagar District Sports Association (WDSA) Stadium-o ong·atanggipa MLA Cup 2026-ni final ba bon·kamgipa robol kal·susaaniko Sonibar salo, Bisi Bima Football Club aro Simsanggre United dolrangni gisepo kal·angaha aro ia kal·susaanio Simsanggre United chegipa ong·e, ia changchetgipa MLA Cup 2026-o ‘Champion’ ine mingako man·aha.

Ia chetgipa MLA Cup 2026 robol kal·susaaniko re·anggipa May 28 tariko a·bachengataha aro ia kal·susaanio dol 45 robol kal·giparang bak ra·e, ia kal·susaaniko East Garo Hills a·jao dal·batsranggipa football tournament ba robol kal·susaani ong·ataha.

Ia MLA Cup 2026-ni final ba bon·kamgipa kal·susaanio, Williamnagar-ni MLA aro a·dokni Cabinet Minister Marcuise N Marak, mongsonggipa sokgipa ong·e bak ra·angaha aro unbaksana ia kal·susaanio, East Garo Hills a·jani Superintendent of Police (SP) Pawar Swapnil Vasaant aro gipinrangba dongpae bak ra·angaha.

Ia tom·anio Williamnagar MLA Marcuise N Marak, jean ia robol kal·susaaniko ong·atna gita tangka paisarangko dakchake on·anio mongsonggipaba ong·a, jinmana aganprakangengon, ia changchetgipa MLA Cup 2026-ko name chu·sokatahani gimin ia robol kal·susaaniko ong·atgiparangko mittelpilangenba, iandakgipa kal·susaanirangko ong·atachi, robol kal·na gisiko nanggipa chadamberangna, an·tangtangni changa sapanirangko mesokna cholko on·ani gita ong·a ine aganaha.

Chief Minister Conrad K Sangma-ni dilanichi Meghalaya sorkarini a·doko kal·susaanirangko namdapatna ka·enggipa kamrangni gimin janapangengon, New Shillong-o ge 40,000 asongchakanirang donggipa gong crore 732-ni Mawkhanu Football Stadium-ko sorkari rikengaha aro ian India a·songo dal·batsranggipa football stadium ong·e, ia stadium-ko 2028 bilsio matchotna siengaha ine Marak parakataha. Tura-o rikenggipa PA Sangma Sports Complex-ni giminba ia tom·anio Marak janapangaha.

Ia changchetgipa MLA Cup 2026-ni bon·kamgipa robol kal·susaaniko a·bachengataonin Bisi Bima Football Club aro Simsanggre United dolgnian biltinggrike kal·aha aro ia kal·anina dongimin minute 90-ni gisepo dolgnian goal-rangko chipna krengbee kal·ahaoba goal-rangko chipgrikna man·jaha. Dongimin minute 90-ni gisepo dolgnian goal-rangko chipgrikna man·jahani gimin ja·mano somoiko ra·dape kal·attaion, kal·aniko dontongna minute-gni skangmangmang Simsanggre United-ni Walchang, free kick-ko tingataha aro uni tingatako apsan dolni Akim Sangma ra·soenba goal chipatna man·aha. Iandake bon·kamgipa somoio goal chipna man·e, Simsanggre United goal 1-0-chi Bisi Bima Football Club-ko cheaha aro ia bilsini MLA Cup 2026-o champion ine mingako man·aha.

Ia kal·susaanio chegipa ong·e Simsanggre United, trophy baksana gong lak 1 tangkako boksis dake man·aha aro Bisi Bima Football Club-ba Runner-up ong·e, trophy baksana gong 50,000 tangkako boksis dake man·angskaaha.

Ia kal·susaaniko ong·atna gita pilak nanga dakchakanirangko on·ahani gimin WDSA-ni member-rang, Williamnagar-ni MLA aro a·dokni Cabinet Minister Marcuise N Marak-ko mittelpilangaha.

Na·simang iakoba nina man·gen: 

Na·simang iakoba poraina man·gen: M’laya transport project matchotna sia

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub