Shillong, Aug 13: Sukrobar pringo Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni goe so·otani ja·man HNLC bobil dolni manderang, Meghalaya a·dokni Home Minister Lahkmen Rymbui aro HNLC-ni bame on·gipa mande sakgniko a·ja sokskana ka·mikkenataha.

HNLC-ni gitcham general secretary ‘Che’-ko Sukrobar pringo police-rangni Mawlai Kynton Massar-o donggipa uni nokko chadrapeani ja·man, dolgnini gisepo gogrikenba so·otgalahachim.

“Home Minister-ni ge·etani gride uko (Cheristerfield)-ko skatang so·ote galjawachim. Uni gimin chinga Home Minister Lahkmen Rymbui aro chingoni an·tangtangko bame on·gipa Herman aro Treng-ko a·jak sokskana manchiangaha. Badita bilsina Rymbui an·tangni chokkio asonga chinga nigen,” ine Sukrobar salo, HNLC-ni general secretary aro publicity secretary Sainkupar Nongtraw, kobor ra·timgiparangna seachi parakataha.

Sianggipa Cheristerfield Thangkhiew-ni nokdangna kalimpaaniko parakatengon, Herman aro Treng baksa kamrangko ka·rimjachina gita HNLC dol, manderangko, NGO-rangko aro bame on·gipa bobil dolni manderangkoba mikrakataha.

HNLC-ni parakatani gitade, bilsi bongana skangan Cheristerfield Thangkhiew-na an·tangko bame on·gimin Herman Pakyntein, ka·mikkenataniko on·ahahachim.

“Da·alo Herman Pakyntein aro Treng Saw gita dakgipa Surrendered Hynniewtrep National Liberation Council (SHNLC) membor-rangni a·selan Cheristerfield Thangkhiew, janggitangko gimaatna nangaha. Uamang skangonin uni janggiko ra·na gita police-rang baksa kam ka·engachim,” ine HNLC-ni publicity secretary parakataha.

So·otako man·gipa Cheristerfield Thangkhiew-de HNLC bobil dolni kamrango jak dongjachim ine talatangengon, ua HNLC bobil dol aro SB, IB-ni gisepo saksa ka·baltitimgipa gitasa kamko ka·engachim ine HNLC parakataha.