Shillong, Aug 14: Hynniewtrep National Liberation Council (HNLC)-ni gitcham general secretary Cheristerfield Thangkhiew, police-rangni gochakaniosa so·otako man·aha ine Meghalaya Police-ni agananiko Hynniewtrep Youth Council (HYC) jegalatenba, Sonibar salo Shillong songjinmani Motphran-o police-rangni kosako jegale banner-rangko songdotokaha.
HNLC-ni gitcham general secretary-ko police-rang ‘tol·pinapgipa gogrikaniosa’ so·ote galaha ine HYC matnangenba, a·dokni Home Minister Lahkmen Rymbui-ko ra·galchina aro Meghalaya Police-ni kosako raiko on·china gitaba dabiangaha.
Cheristerfield Thangkhiew-na kakket bichalko on·china dabiangengon, police-rangni iandakgipa kamko da·o jegaljagenchimode mikkangchi gipin dosgri manderangba so·otako man·gen ine HYC, banner-rango see songdotokaha.
Indake ong·engon, police-rangni jako so·otako man·gipa Cheristerfield Thangkhiew-na mande ra·pilskaaniko on·ani chin gita Robibar salo, a·songni jakgitelaniko salko ‘Black Flag Day’ ine manitokchina gita ‘Ka Sur Ki Nong Mawlai (Mawlai-o songdongenggipa manderangni ku·rang), a·doko songdongenggipa manderangko didiataha. Police-rang niam grisa Cheristerfield-ni nokko chadrape so·ote galaha ineba uamang matnangataha.
Cheristerfield-ko mande ra·ani chin gita Sonibar attamni 7:00 bajio minute 5-na ‘black out’ ba pilak teng·atanirangko kimite andalao dongchina gitaba ua a·doko songdongenggipa manderangko didiataha.
Cheristerfield-ko so·ote galani ja·man uni depante sakgniko sing·sandina rimange kragija dake dokahani giminba ia dolgnian police-rangni kamko jegalataha.
