Shillong, Aug 13: Hynniewtrep National Liberation Council (HNLC) bobil doloni bame on•gipa gitcham general secretary Cheristerfield Thangkhiew-ni nokko chadrapna gita police-rango maming jajaani grigipa sakkirangan dongachim ine Sukrobar salo Meghalaya a•dokni Director General of Police (DGP) R Chandranathan parakataha.
Sukrobar pringwalo, East Jaintia Hills aro East Khasi Hills a•jani police-rang, Mawlai Kynton Massar-o donggipa Cheristerfield Thangkhiew-ni nokko chadrapeani ja•man uko so•otgalaona sokskaahachim ine nikna man•a.
Ia a•selni bidingo a•dokni DGP, Shillong songjinmani Police Headquarter-o kobor ra•timgiparangna talataniko on•angengon, adita salrangna skang Shillong songjinmani Laitumkhrah bazar-o IED bomako gopretanio HNLC-ni gitcham general secretary Cheristerfield Thangkhiew jak dongachim aro iana skang East Jaintia Hills a•jani Khliehriat-o IED bomako gopretaninaba police-rang uko sandiengachim ine parakataha.
Uni nokona re•ange police-rangni chadrapeani somoio ua churichi police saksako chadrappangpilahani giminsa ua police uko gochakskaaha aro bakan uko civil hospital-ona ra•angahachim indiba ua saknaaniko man•e siangaha ineba DGP parakataha.
Uko goani ja•mano police-rang sing•sandina gita uni mande sakgniko rim•baaha aro police-rang uni nokoniko silchidare pongsa aro gipin bosturangko ra•baaha ineba DGP parakataha.
DGP-ni parakatani gitade, police-rangni man•gipa sakkian uko boma gopretanirango jak donga ine mesokahachim.
Indake ong•engon, a•doko maikai HNLC bobil dol kam ka•enga uarangko police-rang name nienga aro ia bobil dolni so•sojengjeng ong•atani kamrangko champengna gita police-rang ja•kurangko de•angkugen ineba DGP parakataha.
