SHILLONG, JAN 15 : Meghalaya a•dokni Skotong Minister Conrad K. Sangma-ni dilanio a•dok sorkari, a•doko niamgri napsrukbagiparangko champengna gital Immigration and Foreigners Act, 2025-o ILP baksa apsangipa niamko chapatpana miksongengani gimin apsan chanchirimna gita pilak party-ni dilgiparang aro songsalna dangdike on•gipa dolrangko okamataha.
Niamni bidingo tale ma•sichenggija jegalenggiparangna aganchakaniko on•angengon, ia niamni bidingo talbate ma•sie ra•na gita pilak dolrangkon apsan tom•e chanchirimna re•bachina Chief Minister okamataha.
Ian Inner Line Permit (ILP), Immigration Act ba MRSSA-ni gimin ong•ja indiba niam gri napsrukgiparangko champengna nangani kattasa ong•enga ine janapatengon, jinma apsan tom•e chanchirimanichisa nambatgipa niamkode ra•gatna man•gen ine Chief Minister aganaha.
A•dok sorkari, darangni ku•pattianiko knachakna kusi ong•an baksana je dingtangatna nanganirang donggenchimode, uarangko dingtangate aro manderangni jajrenganiko naljoke rakkiani gisepon rakgipa aro mangrakgipa niamrangkoba ra•gatanggen ineba ua agandapangkuaha.
Skotong Minister, Meghalaya Residents Safety and Security Act (MRSSA)-ko a•bachengatachim indiba tangka paisarang chu•ongjani a•sel neng•nikanirangko chagrongna nangenga ine Mukul Sangma-ni matnanganina aganchakani on•ataha. Iani gisepon, ia niam aro uno ja•rikna on•gimin niamrang mongsongbate napani aro ong•katani ramarangko tarianio name meli ma•gapjaenga ineba ua agandapangkuaha.
Ia neng•nikani a•selsa, a•dok sorkari gital ba namdapatgimin niamni bidingo chanchirimaniko dakengachim, indiba iano bak nangpagipa pilak dolrang baksa agan-golpogrikaniko daka jamansa jekoba tik ka•anggen ineba Conrad K Sangma u•iatangaha.
