Tura, June 19: Digital Journalism-o nadobaenggipa aski ‘Hub News’, Feedpost list-o India a•songni nambatsranggipa ming 100 News Website-rangoni 11-gipa biapko man•e, chu•sokaniko man•aha aro ia chu•sokaniara a•songni manderangna koborrangko ra•baanio ka•dongchakna man•aniko mesokaniba ong•aha.

Feedpost-ara, news website-rangko dingtang dingtang gadango tosusae biapko on•gipa dol gita ong•a aro Hub News-koba uamang, kamrangko ka•anio chu•sokgipa ong•ahani gimin seokaha. Maming mikkang niteani gri, kakket koborrangko somoi gita on•ahani gimin Hub News-ko da•alo ia gadangona seokaha.

Hub News-ko a•bachengataonin, dingtang dingtang koborrang, jekai politics, business, entertainment, technology, sports aro uandakgipa koborrangko Garochi aro salanti watenggipa English podcast News-chi manderangona sokatenga aro ia koborrangko manderangona sokatna gita dingtang dingtang journalist aro editor-rang salantian rakbee kamrangko ka•tokenga.

Ia chasongo tol•pinapgipa koborrang ta•raken giproroengoba, Hub News pangnan kakket koborko manderangona ra•bana jotton ka•aha aro ia koborrangko pangnan name sandichenge aro kakketko sandiesa manderangona ra•bana kamrangko ka•aha.

Da•alo ia chu•sokaniko man•ahani gimin Hub News-o kam ka•enggipa manderang pilakan, koborrangko poraisoenggipa aro journalism-ni a•bao kam ka•enggipa pilakkon mittelpilatenga aro mikkangchi kamrangko nambatatangkuna gita an•tangtangko on•kangenga.