Shillong, May 30: Japan a•song aro Meghalaya a•dokni gisepo meli-nangrimaniko bilakbatatna gita Sombar salo, Japan a•songni Minister aro Japan Embassy-ni Deputy Chief of Mission Kawazu Kunihiko, Meghalaya a•dokni Deputy Chief Minister Prestone Tynsong-ko grongeaha.

Ia tom•anio dilgipa sakgni apsan chanchirimengon, Meghalaya a•doko namroro silroroaniko ra•bana gita Japan a•songo technology ba gital kolrangko namdapatani gimin aro lekka poraniko tang•doatna gita Shillong songjinmao donggipa North Eastern Hill University (NEHU)-o Japanese ku•sikko ra•gatani gimin chanchirimangaha.

Kawazu Kunihiko-ni aganani gitade, Meghalaya a•dokara salgro salaram a•dokrango lekka porako on•anio bijangchi gita ong•engani gimin Japan a•songna namen mongsonggipa a•dok ong•enga aro Meghalaya a•dokni manderangna Japan a•songni daka rikani aro ku•sikrangko skie on•anio NEHU-ara mongsonggipa kamko ka•gipa ong•gen.

Indake ong•engon, JICA-ni ning•o Meghalaya sorkarina tangka paisani gita dakchakaniko Japan sorkari, gong kror 2000-mangni gita bariataha ine Meghalaya a•dokni Deputy Chief Minister Prestone Tynsong parakatskaaha.