Shillong, Dec 6: Jaiñtia Hills Autonomous District Council (JHADC)-ni Executive Committee, uamangni CEM Pa Thombor Shiwat-ni dilanichi batanggimin salo obosta ong·anggipa West Jaintia Hills a·jani Elaka Shiliang Myntang-ni ning·o ga·akgipa Mukroh songona Mongolbar salo wenangaha.
Mukroh songona sokearin, Council-ni Executive Committee, songni-nokni dilgiparangko grongenba Assam-ni Mukoilum Police Outpost-oni km 3-4 mang chel·gipa Mutha Siang Kwai ine minggipa Zero Point aro Barato- Mukoilum Road ba rama gita songni sima-ariona re·ange nirokangaha.
Uandake, 1968 bilsio sima-ariko bak dake on·gimin map-ko niam gita ua songna on·gipao mesokani gitade aro songni-nokni dilgiparangni aganani gitade, Barato-Mukoilum point aro Kutcha ramara Mukroh songni ning·omanchagipa Meghalaya aro Assam sima-arini Zero Point ong·aniko talen mesokachim aro ua point-ni nalsara Elaka Labang Nongphyllut-ni ong·skaaniko nikna man·aha.
Mukroh songona wenange nirokeanio, Council-ni memborrang, batanggimin November 22 tariko Assam police aro Assam forest Guard-rangni slai goanichi rasong gribee songoni sianggipa sakbonga manderangni janggirangna dikdiksa somoina jrip donge bi·rimanikoba dakangaha.
Unbaksana, Mukroh songni manderangko Assam sorkarini changanti sinjetanirangko on·ani bidingo manderangni agananirangko knae ra·jolna gitaba JHADC-ni EC, salni bako songko-noko dilenggiparangko gronge uamang baksaba agan-golpobajolaha
