Shillong, Nov 1: Meghalaya a•dokni private company-rango joltangni chadamberangna 80 percent biapko donchina dabie re•baenggipa November 4 tarik dipet Main Secretariat mikkango asonge jingjengatanggen ine Mongolbar salo Hynniewtrep National Youth Movement (HNYM) parakataha.
Iani bidingo kobor ra•timgiparangna talataniko on•angengon, a•dokni pilak biaprango donggipa private company-rangon joltangni chadamberangna 80 percent biapko kangna gita dingtangmancha niamko ra•gate on•china dabie, re•anggipa October 20 tarikon uamang a•dokni chief minister Conrad K Sangma-na memorandum-ko on•ahachim indiba da•alonan sorkari maming aganchakanirangko on•kujaenga ine HNYM-ni president Louis Dohtdong parakataha.
Uamangni dabianiko a•dok sorkari aro chief minister knachakna gisiko nangjaengani gimin re•baenggipa November 4 tarik dipet Secretariat mikkango asonge jingjengatanirangko dakna tik ka•aha ineba Dohtdong parakataha.
A•songni Union home minister Amit Shah, re•baenggipa November 7 tariko Shillong-ona re•banaba gnang ine ka•dongsoengani gimin uamang, a•doko songdongenggipa manderangni aro mongsongbate chadamberangni nanganirangko u•iatna gita November-ni 7 tarikoba apsan daken Secretariat mikkango asonge jingjengatangkugen ineba HNYM-ni president parakataha.
Main Secretariat-o jingjengatanirangko champengna gita Section 144 CrPC-ko East Khasi Hills a•jani deputy commissioner ra•gatahaoba uamang manigija sorkarini kosako jingjengatanggen ineba Dohtdong parakataha.
