Shillong, Jylliew 08: U Kyrtong Rajya Sabha jongka MDA-II u James PK Sangma hynne ka sngi Nyngkong ula iada ia ka kyrdan kaba u bat kum u President jong ka Meghalaya Cricket Association, da kaba ong, ba ka ain ka shah ia u MLA ne MP ban shim ia ka kyrdan ban pyniaid ia ki kam ha ka synjuk ialehkai hynrei ym pat kum u Myntri Sorkar.
Haba kylli halor ka jingbat ar kam haba leit ban thep kyrteng na ka bynta ka elekshon Rajya Sabha, u Sangma ula ong, ba katei ka mat kadei kaba la synshar da ki kyndon ain kiba la batai shai kdar bha.
“Ka ain kala long kaba shai kdar bha halor katei. Kum u MLA ne MP, phi lah ban bat ia ka kyrdan ha ki Sports Association hynrei um pat kum u Myntri Sorkar ne ban don ha ka Sorkar” ula ong.
U Sangma ula kubur ba ka MCA kala mad ia ki jingeh kiba la sahteng la bun snem kaba la pynsuki ia ka rukom treikam ka jongka bad ula ong ban pynbeit ia kitei kadei ka mat kaba u buh hakhmat eh.
“Kane kadei ka kam iing jong ka MCA. Hooid ngan ym kiar na ka jingshisha ba kila don ki jingeh. Kine kidei ki jingeh kiba la iaid mynta la bun snem bad namar jong kitei ki jingtynjuh bad ki jingeh, kila don ki katto katne ki bynta kiba la pynsangeh. Ngi khmih lynti ban pynbeit noh ia kitei ia ki jingeh bad ki mat mardor. Nga sngewkhia bha halor jong ki nongtrei, la kidei ki Support Staff ne ki Office Staff,” ula ong.
Naduh ba la shimti kum u President ka MCA ha u bnai Kyllalyngkot, u Sangma ula ong, ba ula shimkhia ban pyndap ia ki jaka kiba duna ha ka jingpyniaid kam hapoh jong ka Association kaba kynthup ia ka kam Ombudsman kaba la shu ieh thylli la palat ia ka 2 snem.
“Kadei ban don ka Internal Committee. Nga lah shimti kum u President ha u Kyllalyngkot bad nga lah tip bha ia ka jinglong jingman bad ia ki jingduna bad ki jingdkoh hapoh jong ka MCA. Nuksa ha ki 2 snem kiba la leit, kumta kaba nyngkong eh kaba nga lah leh kum u President ka long ban pyndap ia ki kyrdan bad ban wanrah ia u Ombudsman” ula ong.
Halor ki mat kiba dang sahteng kiba iadei bad ki Committee jong ka Association, u James Sangma ula ong, ba ka MCA ka dang ap ia ka kaiphod na ka State Women’s Commission ha shwa ba kan shim ia kino kino ki sienjam.
“Shuh ka Internal Committee kadei kaei kaba ngi ngin sa shimkhia. Ngi dang ap ia ka kaiphod jong ka Women’s Commission bad hadien ba la mih ka kaiphod ngin sa shim ia ki sienjam kiba dei halor jong katei ka mat” la bynrap u Sangma.
Ula ong, ban pynneh ia ka rukom treikam bad ia ka jingkhuid jingsuba ha ka jingtreikam jong ka Association kadei kaba un phaikhmat bha ha ka samoi treikam ka jongu kum u President.
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
