Guwahati, Feb 10: Assam a·doko ia bilsi pu·onaniko dakangna parakatani ja·man, ma·mongni home minister Pa Amit Shah gittamgipa chang ong·e a·dokona wenbataienganio, saliram Assam-ni Bodoland Territorial Region-ni Chirang district-oni Koch Rajbongshi nokdangni raja ine an·tangko manderangna u·iatgipa Ananta Rai-ko uni noko knal Bristibar salo gronggen.
Bilsini bijangchio eleksinrangko ong·atenggipa saliram Assam aro West Bengal-ni salgro-salaramni bakan ong·gipa jolgimik gipaigipa Koch jatrangni pal ong·e gimik dakakon jako ra·e nirokenggipa Rai-ko gronge eleksinni bidingo nangchongmotgipa agangrikna nangarang dongani gimino uko grongna miksongenga.
Rajani gadangko man·gipa Ananta Rai-chi nirokenggipa Cooch Behar-ni manderangan West Bengal aro Assam a·dok damgnion gipaiaha, indake West Bengal-o Koch Rajbongshi jatna dingtang a·dokko ba territory-ko dabienggipa dol Greater Cooch Behar People’s Association (GCPA)ni dilgipaba uan ong·enga. GCPA, Rai-ko uamangni Maharaja ine chaneming batanggimin 1998 bilsio una chu·gimik bilko on·angaha.
“Anga aro GCPA, da·o Bengal-o sorkariko rikenggipa Trinamool Congress dolni kosako maming mikbuani grioba NDA sorkarina pangnan chakbaenga ine agananga baksa, mija january 30 ba 31 tariko (Union) Home Minister an·tangan gisiko sikani gnang angko Delhi-o uni noktango grongna okamate angni nokni manderangko grongna nangnikenganiko angna aganataha. Politicalni giminba chinga ua somoio golpoaha aro da·o uni re·bao bang·ani gimin agan-golporimani ong·gen ine ka·dongsoenga,” ineba Rai parakaha.
“Assam aro West Bengal eleksinrango chinga NDA-nan chakgen aro a·dok damgnio dongenggipa Koch Rajbongshi jatna maidakgipa cholko on·angna miksongenga iani giminba chinga Home minister-ni ku·sikoniko knana ka·oksie sengsoenga,” ine lak 18.5 mangna baten uko ja·rikgiparang gnang ine a·kangenggipa Rai janapataha.
Indake ong·engon, ma·mongni Home minister-ni sokbana skangan sipairangni seng·gipa achakrangko rimbite police-rang Rai-ni nok wilwilao re·wenwene nirokatan baksana chelchakanikoba namen bing·tipatsoaha.
