Shillong, May 19: Manderangko kenjagokjachina aro bazar antirango jinma koros ka·jachina sorkari u·iatmanahaoba, East Khasi Hills a·jao Budbar attam 8:00 baji dipet chu·gimik lockdown-ko a·bachengengahani gimin East Khasi Hills a·jani dingtang dingtang biaprango aro mongsongbate Shillong songjinmao manderangni kenjagoke koros ka·chichaanirangko nikna man·aha.
East Khasi Hills a·jao chu·gimik lockdown-ko Budbar attamoni a·bachenge May 31 tarikona ong·atengani gimin bang·a manderangan Budbar attamo an·tangtangna nanga bosturangko brena gita bazar antirango tom·daktokskaaha.
Shillong songjinmani bang·bata bazar antirangon manderangni jinma jinma koros ka·na tom·dakanirangko nikna man·ahani gimin district administration-ni official-rang, manderangko niam ja·rikatna gita nirok sandina nangaha.
Mitam biaprangode jolni manderang an·tangtangan, volunteer dake manderangni koros ka·anirangko nirokangskaaha aro niamrangko ja·rikchina manderangko didiangaha.
Meghalaya a·doko aro mongsongbate East Khasi Hills a·jao COVID-19-ko man·giparang batroroengahani gimin sabisini giproroaniko champengna gita sorkari Budbar attamoni a·bachenge May 31 tarik pring 5:00 bajiona chu·gimik lockdown-ko ra·gatangtaiahachim.
