Shillong, May 19: Meghalaya a·doko ta·raken COVID-19 batrikrikengahani gimin Budbar salo, Meghalaya Legislative Assembly-ni Speaker Metbah Lyngdoh, a·dokni pilak MLA-rang baksa tom·e chanchirimangaha aro COVID-19-ni giproroaniko champengna apsan nangrime kamko ka·na gita ku·mongdilangaha.
Tom·a matchotani ja·mano kobor ra·timgipa manderang baksa agangrikengon, a·dokni MLA-rang, manderangni seokako man·gipa dilgiparang ong·e saksa sakgipinni ku·pattianirangko ra·na gita ia tom·aniko ong·atna nangaha ine Assembly-ni Speaker parakataha.
“Ia tom·anio a·dok sorkari, COVID-ni giproroaniko champengna ja·ku de·anirangko, COVID man·gipa manderangna sanna bananirangko on·ani bidingo aro COVID-ni tikarangko su·ani bidingo MLA-rangna talate on·angaha,” ine Lyngdoh parakataha.
Lyngdoh-ni parakatani gitade, a·dokni dingtang dingtang biaprango oxygen plant-rangko songani bidingo, sagipa manderangna palangrangko bariatani bidingo aro Corona care centre-rangko kuliani bidingoba MLA-rang apsan chanchirimangaha.
“Chinga pilakan an·tangtangni chanchianirangko aro ma·sianirangko ia tom·anio on·paaha aro membor-rang pilakan ia tom·anio gisiko nange bakko ra·tokaha. MLA-rangni ku·pattianirangko sorkari see ra·rikaha aro nanga gita ja·kurangko de·na ku·rachakaha,” ine Assembly-ni Speaker, ia tom·ani chu·sokgipa ong·ahanina an·tangni chu·ongnikaniko parakataha.
Ia sal somoirango tikarangko su·anichisan an·tangtangko naljoke rakkina man·gen ineba ua a·doko songdongenggipa manderangko tika su·e ra·china didiangaha.
COVID-ko warachakanio sorkari baksa bakrimchina aro pilak nanga dakchakanirangko on·china gita ua jolni dilgiparangko, NGO-rangko aro toromni dilgiparangkoba didiataha.
Ia tom·anio Opposition dolni dilgipa Mukul Sangma-ba dongpae bak ra·angaha aro manderangni nangnikanirangko chu·sokate on·china sorkariko didiangaha.
Bang·a manderangan COVID-ni a·sel siangna nangahani gimin sorkarini olgrokenggipa kamrangko namdapatchina gitaba ia tom·anio opposition dolni dilgipa didiangaha.
Sabisiko warachakna man·na gita an·tangtangko an·seng baljoke rakkichina gitaba Sangma, chadamberangko didiangaha.
Ia tom·anio a·dokni Chief Minister Conrad K Sangma-ba tom·anio bakko ra·e sorkarina ku·pattianirangko on·ahani gimin pilak MLA-rangkon mittelpilangaha aro MLA-rangni ku·pattianirangko nangani kri chu·sokatna ku·rachakangaha.
A·song gimikon tikarang chu·ongjaenga ine janapatengon, Meghalaya a·dokoba apsan daken tikarang chu·ongjaenga indiba mikkangchi tikarang chu·onga gita sokbahaon a·doko COVID-ko bilakbate warachakangna man·gen ine Chief Minister, an·tangni ka·dongchakenganiko parakataha.
