Tura, April 15: Garo Hills-ni manderang jemangkon seoke watataha uko chinga ra·chakna kusi ong·a ine Meghalaya a·dokni skotong minister Pa Conrad K Sangma, Bristibar salo GHADC eleksinni result-rangko parakatani ja·man koborna parakataha.

Result-rangko parakatani dikdiksa ja·man ia eleksino Congress dolni ka·mao gnigipa biaposan NPP dolni chena gita man·aiahanina Tura, Walbakgre-o donggipa noktangoni koborni manderangna agan-talatengon, “Manderangni seoke watatanirangko chinga ra·chakna gita kusi ong·engon, apsandake chingko iana bateba rakbate kamrangko ka·angna gita didianiko on·jolaha aro da·oniko cha·totanichin skie ra·na nangchongmotgipa ong·ataha,” ine skotong minister Pa Conrad Sangma aganaha.

Garo Hills-ni mongsongbatgipa Tura MDC seat-ko BJP dolchi amata man·ani gimin aganengon, ian bang·a dingtang dingtang a·selrangni gimin ong·aha jeon namen rakbee susagrikaniko nikangna gita man·aha ine skotong minister ku·rachakaha.

“GHADC-o kam ka·giparang Tura songjinmaoni ong·bata aro uamang an·tangtangna ja-kolatchi mangni betonrangko on·na man·jahani gimino suk ong·tokjaha aro beton on·na man·gijanina NPP-chi rikdilgipa EC-kosa matnangaona sokaha,” ineba skotong minister agankuaha.

Ianpakni eleksino seat-rangni tang·onanina, ian kamko jako ra·e ka·anggipa dilgiparangni kosako manderangni suk ong·nikgijanichi ong·na man·aia baksana bang·a dingtang dingtangrangni giminba ong·aha ine Pa Conrad Sangma ku·rachakaha.

“Chinga atagrikmangonade sokdona gita ka·dongsoachim indiba indake ong·jaha. Apsandaken, Congress dolba iana skang GHADC-o EC-ko rikangani ja·man skangni eleksino gitade apsanko chena gita man·jaha ineba skotong minister agandapaha.

Ua somoini eleksino warachakgipa NPP dol, sasono ong·gipa Congress dolko ge 10 seat-rangchi amatahachim.