Imphal, Jan 10: Manipur a•dokni Imphal West a•jao donggipa Wangoi jolo, police commando saksako man•chape gimik sakgni manderang, ma•sina man•gijagipa manderang goe galangaha ine Sombar salo police official-rang parakataha.
Police official-rangni u•iatani gitade, Robibar walo, bobil dolni manderang ong•na nanga ine chanchichipenggipa adita sak manderang, gari chonao re•bae, Imphal songjinmaoni km 30-mang chel•ao donggipa Wangoi jolo, bilsi 57 ong•gipa Abujam John aro bilsi 37 ong•gipa Abujam Tomba-ko goe galangaha.
A•sel ong•ani ja•mano goa man•gipa manderangko Imphal-o donggipa hospital-ona ra•angengmitingo John siangaha aro police commando Tomba-de saknaanirangko man•enba, hospital-o siangskaaha ine kobor on•aha.
Ia a•sel ong•ani ja•mano dos dakgipa manderangko rim•na gita sipai dolrang sandina a•bachengataha.
Manipur a•dokni Assembly election-ko ong•atani bidingo Sonibar salosan Election Commission jinmana u•iataniko on•angahachim aro election-ko ong•atani bidingo parakatani ja•man ian skanggipa changna so•sojengjeng ong•aniba ong•aha.
Ia a•sel ong•ani ja•mano Manipur a•dokni Chief Minister N Biren Singh aro Agriculture Minister Oinam Lukhoi, a•sel ong•gipa biapona re•ange, so•ota man•gipa manderangni nokdangrangkoba grongeaha.
Ia mande sakgniko so•ote galangani ja•man jolo songdongenggipa manderangba, ia a•sel ong•aniko jegalna gita Sombar salo ramarangko champengate jingjengatanirangko dakangaha.
