Guwahati, May 15: Manipur-oni bobil dake chakatgipa dolo napgipa bilsi 46 ong∙gipa mande saksa, Bristibar pringo Assam-ni Cachar a∙jao gogrikanio so∙ota man∙aha ine official-rang parakataha.
Sianggipa mandeni bimung Sailen Daungal ong∙a aro ua United Kuki National Army-ni (UKNA) gitcham membor ong∙achim, jean Assam-Manipur sima ari-o drugs badingsrukanirango jak donga ine matnanganiko man∙achim.
Uandake police dolrang uamangko re∙anggipa walo am∙sandie man∙aha aro Buma Punji-o rim∙aha. Sing∙doanirangko dakengmitingo donnugimin silchidarerangko man∙na police-ko dakchakgen ine uamang aganaha indiba biapona sokon uamang silchidarerangko ra∙e police-rangko chadrapna a∙bachengaha ine police official saksa aganangaha.
Jirighat Police Station-ni police dolrangba slairangko gochakaha aro unon Daungal-ko gulirang nange ua saknaaniko man∙aha aro ja∙mano janggi galaha ine police parakataha.
May 5 tariko Assam-Manipur sima ari joljol Jirighat sepango donggipa Diglang minggipa biapo police-ni am∙sandianiko dakengmitingo drugs badingsrukgiparang Havildar Sharif Hossain Kzi-ko (55) changgni goaha. Ia obostao Daungal-ba jak dongpaa ine police aganangaha.
Kazi-ko Silchar Medical College and Hospital-ona (SMC) rimangchengaha aro ja∙mano nambata sanna-bananiko dakna ine Guwahati-ona adasurango rimangaha.
Daungal, Manipur-ni Tamenglong a∙jaoni ong∙a aro a∙doko dingtang dingtang jatrangni kajia-golmal ong∙ani somoio Lakhipur-ona re∙baenba Cachar a∙jani Buma Punji jolo songdongengachim.
“Drugs badingsrukgiparangni police-ko chadrapani ja∙mano chinga Daungal-ni kamrangko am∙sandie niaha aro a∙dok damsaoni damgipinona pekgipa bosturangko aro silchidarerangko badingsrukanirango jak donga ine u∙ina man∙aha,” ine sakgipin police official aganangaha.
Uandake Narcotic Drugs and Psychotropic Substances (NDPS) Act aro Arms Act-ni ning∙ao badi ka∙anirango baditaba mingo Daungal-ni bimung donga ineba Police agandapangaha.
Na·simang iakoba nina man·gen:
Na·simang iakoba poraina man·gen: American MNC-ni bimungo biometric data-ko chimonganina Cachar Police Mizoram-ni sakgni manderangko rim∙a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
