Manipur, May 30: Manipur a•dokni Thoubal districto ning•o damsa community hallo bilakbegipa IED bom sombar pringo bretanichi saksa mande so•otako man•aha aro sak brirang bilongbee mata-bu•ako man•tokaha. Uamang gimikan west Bengaloni ong•tokachim ine policerang aganaha. Policerangni aganai gitade ia bilakbegipa bomko Khongjom minggipa biaponi remote controlchi bretataha jeon bilsi 21 ni Pankaj Mahato minggipa so•otako man•aha aro gipin sak bri mata bu•ako man•aha. Saknaako man•giparangko bakbakan Thoubal districtni hospitalona ra•angaha.
Ia sak bonga manderanga ge•sa private companyo kam ka•enggiparang ong•achim, uamangni community hallo tusimiting somaiosa ia bilakbegipa bomko bretataha. Bilongbee mata-bu•ako man•giparanga bilsi 30 ong•gipa Souvik Patra, bilsi 18 ni Aporva Mandal, bilsi 25 ni Rajesh aro bilsi 19 ni Ramanik ong•achim, uamang gimikan West Bengaloni ong•tokachim.
Ia a•sel ong•aniko kobor man•anrin policerang a•damona chawatangaha aro a•sel-obostako sandirikkotenga.
Manipur a•dokni skotong minister ia a•sel ong•anina duk ong•bee jegalataha. Ian ka•pongrangni kam ong•a. Dos gri kam ka•e cha•giparangko so•otaniara ka•pong ong•aniko aro gisik sokmanginaniko mesoka ine ua aganaha. Ia a•sel obostako Khongjom police stationo segataha aro dosi donggiparangko sandirikkotna kam ka•chakatengaha.
