Shillong, Dec 7: Mongolbar salo Meghalaya a•dokni Chief Minister Conrad K Sangma, South West Khasi Hills a•jani Mawkyrwat jolo donggipa Umoid-o St Xavier’s Higher Secondary School-ni gital building-ko nokdonggae on•angaha.
Ia skulni gital building-ko nokdonggae on•angani somoio a•dokni PHE Minister Renikton Tongkhar Lyngdoh, salgro salaram jolo Jesuits-ni Regional Development Director Fr Anand Pariera aro gipinrangba dongpae bak ra•angaha.
Ia skul nokko nokdonggae on•anganio a•dokni Chief Minister, jinmana aganprakangengon, Jesuit-rangni dingtang dingtang kamrangchi songsalni namroro silroroanina bang•en on•gilanirangko dakaha ine an•tangni mittelpilaniko parakangaha. Ia St Xavier’s Umoid mikkangchiba jolo songdongenggipa manderangna a•gilsakni seng•aniko on•angkugen ineba ua an•tangni ka•dongchakenganiko parakangaha.
Ia program-ko ong•atanio chatro chatrirangni dakmesokanirangko nike, uamangni changa sapanirangna aiao inmananiko parakangengon, an•tangtangni kamrango bimchipgiparang ong•china aro pangnan namgipa gunko ra•bite chu•sokgiparang ong•china Chief Minister didiangaha.
South West Khasi Hills a•jao tourism-ko tang•doatna gita sorkari, gipin a•songrangni dakchakanirangko ra•enga ineba ia tom•anio Chief Minister parakangaha.
Manderang buringrango donggipa bosturango ba bon•changnagipa a•ningni bosturango pangchakna nangjana gita sorkari, manderangna dingtang janggi tangani cholrangko on•na jotton ka•enga ine janapatengon, tourism-ko tang•doataniara ia jolrango songdongenggipa manderangna janggi tangani cholrangko on•ani gita ong•gen ine Chief Minister aganaha.
