Shillong, Sep 16: National People’s Party (NPP)-chi dilenggipa Meghalaya Democratic Alliance (MDA)-II sorkarini Cabinet-o rimnapa man•gipa gital sakchet minister-rangko Mongolbar attamo, a•dokni Governor CH Vijayashankar, Raj Bhavan-ni Durbar Hall-o ku•mikchetdilangaha.
Gital Cabinet minister ong•e ku•mikchetanggipa sakchet MLA-rangara, Jowai-ni NPP MLA Wailadmiki Shylla, Jirang-ni NPP MLA Sosthenes Sohtun, Dalu-ni NPP MLA Brening A Sangma, Resubelpara-ni NPP MLA Timothy D Shira, Mairang-ni United Democratic Party (UDP) MLA Metbah Lyngdoh, Amlarem-ni UDP MLA Lahkmen Rymbui, Mawshynrut-ni HSPDP MLA Methodius Dkhar aro South Shillong-ni BJP MLA Sanbor Shullai ong•a.
Ia gital minister-rangna tikatgimin portfolio-rangko bakan sorkari jinmana u•iatgen.
Gital minister-rangni ku•mikchetani ja•man Cabinet-ko gital dake sualpiltaiani bidingo a•dokni Chief Minister Conrad K Sangma, kobor ra•timgiparangna talate on•angengon, Meghalaya a•dokni pilak a•jarangon Cabinet minister-rangko donatna miksongenba, MDA sorkario bakrimenggipa dingtang dingtang dolrang aro dilgiparang baksa agangrikchengesa Cabinet-ko sualpiltaiaha ine parakataha.
MDA sorkariko chalaianio NPP doltangarian bilrang chu•onggenchimoba, 2023 bilsio bakrimenggipa dolrangna ku•rachakaniko chu•sokatna gita Cabinet-o pilak dolni dilgiparangkon rimnapaha ineba Sangma aganaha.
Manderangni nangnikanirangko chu•sokatna gita Cabinet-o Ri Bhoi aro West Garo Hills a•jarangko man•chape dingtang dingtang a•jani dilgiparangko rimnapaha ineba Chief Minister aganaha.
Gital minister ong•e ku•mikchetgipa MLA-rang, a•dokni namroro silroroanina kamrangko ka•anggen ine an•tangni ka•dongchakenganiko parakatengon, ia gital minister-rangni kamrango Cabinet-ni gitcham membor-rang dakchakanirangko on•gen ine Sangma aganaha.
Sorkariko chalaiani bijangchio Cabinet-ko sualpiltaianichi minister-rang, dingtang gadango kamrangko ka•na tariengani gimin ian sorkarini kamrangko mangrakbatatna dakchakani ong•a ineba ua aganaha.
Gital minister-rangni ku•mikchetanio, dingtang dingtang dolni dilgiparang, sorkari official-rang aro gital Cabinet minister-rangni nokdangrangba dongpae bak ra•angaha.
Na·simang iakoba nina man·gen:
Na·simang iakoba poraina man·gen: Shaurya Sharma, NE Zone Shooting Championship-o Gold medal-ko man·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
