Shillong, May 11: National People’s Party (NPP)-chi dilenggipa MDA 2.0 sorkariko be•gruatna, Trinamool Congress (TMC)-ni dilgipa Mukul Sangma baksa agangrika dongja ine Bristibar salo, Bharatiya Janata Party (BJP)-ni MLA aro a•dokni Cabinet Minister Alexander Laloo Hek a•kangataha.
Mukul baksa agangrika ine kobor on•aniko jegalatengon, MDA 2.0 sorkariko songaonin ua Dr Mukul-ko gronga dongkuja aro Dr Mukul-ba uko grongea dongkuja ine Hek talataniko on•angaha.
Hek-ni parakatani gitade, Assembly session-ni neng•takengmiting somoiosa uamang sakgnian saksa sakgipinko doltangtango napchina ‘bal•eke’ aganaiahachim.
Sorkariko be•gruatna ba MDA sorkarini kosako uamang golpoa dongja ine talataniko on•angengon, ian uamang sakgnini gisepo saksa sakgipinko bal•ekgrike roasan ong•aia ine BJP MLA parakataha.
An•tangna tikatgimin portfolio-na chu•ongnikaniko parakatengon, MDA 2.0 sorkariko rikaoni da•o jagnisan ong•kuengpiti aro Meghalaya a•doko bang•en namroro silroroaniko nikna man•engaha ine Hek parakataha.
NPP baksa kamrangko ka•rimanio ua maming neng•nikanirang dongja ine janapatengon, TMC ba Congress baksade BJP maming saloba kamko ka•rimna man•jawa ine Hek parakataha.
