Shillong, July 5: National People’s Party (NPP)-chi dilenggipa Meghalaya Democratic Alliance (MDA) sorkarini dingtang dingtang kamrangko a•bachengatanichi aro ia kamrango chu•sokgipa ong•enganichisa uni sorkari, BJP-chi dilenggipa National Democratic Alliance (NDA) sorkari baksa nangrime kamko ka•na man•skaenga ine Budbar salo, Meghalaya a•dokni Chief Minister aro NPP-ni national president Conrad K Sangma parakataha.
India Today Conclave – Northeast-ni session-ko ong•atanio Meghalaya a•dokni Chief Minister agangrikengon, ua onbatgipa gadangonin sorkarini kamrangko namdapatna jotton ka•enga ine parakataha.
“Angni aganna miksonganide chinga nama miksongani gnangsa kamrangko ka•a aro sorkarini kamrangko namdapatna kam ka•anio chinga ma•mong sorkarini dakchakanirangko man•skaenga. Uni gimin an•ching manderangna maiba miksongani gnang kam ka•genchimode pilakan chu•sokgipa ong•na man•aia,” ine Sangma aganaha.
Batanggimin bilsirango aro mongsongbate NDA sorkarini somoio, salgro salaram a•dokrangna ma•mong sorkari bang•a namgnirangko ra•baaha ineba Meghalaya CM parakataha.
“Angni chanchiani gitade, NDA sorkari salgro salaram a•dokrangna mande ra•ani dongani giminsa namgnirangko ra•baaha aro NDA sorkari gita batanggimin sorkarirangde kam ka•a dongkuja gita nika,” ine Sangma aganaha.
Manderangni matnanganirangko ua dal•e ra•gija kamtangko ka•enga ine janapatengon, saksa dilgipa ong•e a•gilsakni matnanganirangko chanchigija kamko chu•sokatanian mongsongbatgipa kam ong•a ineba Chief Minister parakataha.
