Tura, Aug 28: Tura Medical College-ko rikani, dingtang dingtang kal•chakram biaprangko rikani aro Jal Jeevan Mission-ni kamrangko nipilna gita Bristibar salo, Meghalaya a•dokni Chief Minister Conrad K Sangma, dingtang dingtang officer-rang baksa Tura-ni Circuit House-o tom•aniko ong•atangaha.
Tom•aniko a•bachengatanio, dingtang dingtang officer-rangna talataniko on•angengon, ian kamrangko nipilnasan ong•aija indiba officer-rang an•tangtangni neng•nikanirangko aganna aro cholrangko mesoke on•na miksonge ong•atenggipa tom•ani ong•a ine Chief Minister aganaha.
Tura Medical College-ko rikani bidingo chanchirimangengon, college-ko rikani kamrang da•o 78 percent-ni gita matchotaha aro 2026 bilsini September jaode matchotna ka•dongenga ine official-rang, Chief Minister-na talate on•angenba, ia medical college-ona dakanggipa dolong sambao rama chubeani gimin dingtang biapko nina nangenga ine parakataha. Ia medical college-na skigiparangko nangkuengani gimin neng•nikanirangko chagrongna nangkuenga ineba official-rang talataniko on•angaha.
Shillong Medical College-ni bidingo talataniko on•angskaengon, ia medical college-ni class-rangko 2025 bilsini September jaon a•bachengna man•gnok ine ka•dongenga aro admission-rangko 15 percent All India quota aro a•dokni bewalo ra•anggen ine official-rang parakataha.
Shillong, Tura aro USTM medical college-rangko chalaina siengahani gimin 2030 bilsiode Meghalaya a•doko bilsiantian sak 550-na baten doctor-rangko ong•katatna man•gnok aro central pool seat-rango pangchakaniko komiatna man•gnok ine Chief Minister aganskaaha.
A•doko kal•susaani aro kal•chakram biaprangko tariani kamrangko nipilangskaengon, kal•susaanirangko songadam nokadamrangonin kal•chakram biaprangko on•e aro skie on•anirangchi namdapatna nanga ine Chief Minister aganaha.
Chadamberangni changa sapanirangko namdapatna gita dingtang dingtang dolrangni bakrimna nanganirangko janapangengon, dingtang dingtang kal•susaanirangko district aro state level-o ong•atjringna gita ia tom•anio Chief Minister chanchirimdilangaha.
Kal•susaanirangko ong•atanio bilakbate daitorangko ra•china gita Chief Minister, district administration-rangkoba didiangaha.
Manderangni nangani aro neng•nikanirangko ma•sie ra•na man•na gita CM Connect gita dakgipa program-rangko ong•atangkugen ineba Chief Minister parakataha.
Jal Jeevan Mission (JJM)-ni kamrangko nipilangskaengon, 90 percent kamrang matchotaha ine report-rango mesokengoba 20 percent-mangni gita nokdangrang, chirangko man•kujae neng•nikanirangko chagrongna nangtokkuengani gimin badia kamrang chu•sokgipa ong•enga aro badia kamrang chu•sokjaenga, ma•sie ra•na gita a•dok gimikonikon name am•sandichina Chief Minister ge•etangaha.
JJM-ni kamrangko nirokna dongipa Village Water & Sanitation Committee-rangni gimin chanchirimangengon, ia committee-rangoni bang•batan kamrangko ka•jaenga aro mitam committee-rangde tangka paisani gita dakchakanirangko man•jaengani gimin daitorangko jako ra•na siktokjaenga ine official-rang parakataha.
JJM-ni kamrangko matchotna gita dongimin nisanko chu•sokatna sikkeldugaani a•selba mitam kamrango nangchakeaniko man•aha ine janapatengon, ia kamrangko da•o namdapatskana gita gisik on•e kamko ka•na nangenga ine Chief Minister aganenba, iani bidingo cholrangko sandie kam ka•china officer-rangko ge•etangaha.
JJM-ni kamrango tangka paisani gita chagrongna nanggipa neng•nikanirangko janapangengon, India sorkarioni tangka paisarangko watatningjahani a•sel contractor-rangna crore 2000-mang ong•pile grorang dongkuenga ine Chief Minister aganenba, ia bilsini bon•angachibarade ia neng•nikanirangko namatna man•gnok ine an•tangni ka•dongchakenganiko parakataha.
Na·simang iakoba nina man·gen:
Na·simang iakoba poraina man·gen: Gital rikgimin Governor House-ko Assam CM nirokea
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
