Shillong, April 22: Bijoli bikotenggipa dingtang dingtang company-rangna MeECL-ni gro nangkuenggipa gong kror 600 tangkarangko chotna gita Meghalaya sorkari, Atma Nirbhar loan-ni gnigipa bakko on•china ma•mong sorkariko didianggen ine Bristibar salo, a•dokni Chief Minister Conrad K Sangma parakataha.
“Dingtang dingtang bijoli karkanarangna MeECL-ni gro nangkuenggipani bidingo chinga chanchirimaha aro ia grorangko chinga ma•mong sorkarini Atma Nirbhar loan-chi chotna gita tik ka•aha. Batanggimin bilsi 10-15-mangonin MeECL, dingtang dingtang bijoli karkanarangna grorang dongkuengani a•sel neng•nikanirangko chagrongna nangenga,” ine Bristibar attamo tom•e chanchirimani ja•man a•dokni Chief Minister, kobor ra•timgiparangna parakataha.
Koborko on•ani gitade, bijoli bikotenggipa aro bijoli on•enggipa dingtang dingtang company-rangna MeECL, gong kror 1000-na baten grorang dongkuengachim.
“Bijoli bikotgipa company-rangni grorangko MeECL, somoi gitan gamjringenga indiba ian bilsi 10-15-mangna skangonin dongbaenggipa grorang ong•e grorangko chotanio neng•nikanirangko man•na nangenga. Iani giminsa chinga grorangko gamna man•na gita loan-ko on•china ma•mong sorkariko didina tik ka•angaha,” ine Sangma aganaha.
Bijoli bikotenggipa aro bijoli on•enggipa dingtang dingtang company-rangna nangkuenggipa grorangoni 50 percent-koba Atma Nirbhar loan-ni skanggipa bakchian gamna man•aha ineba Chief Minister parakataha.
