Guwahati, Sept 27: India Tourism Data Compendium 2025-o sandie niani gitade, a·songoni manderangna bateba, Meghalaya-ona re·bagipa tourist-rang a·palchini bang·bata ine nikna man·aha.
India-ni Salgro Salaram jolrangona a·songni a·palchini manderang re·bana namnikbata, indiba a·songtangni manderangni re·baaniko niatgenchimode, inditana kingkingde ong·ja.
2024 bilsio, a·songni chu·gimik 3,009 million touristrang dongaoni, Salgro Salaram-ni damchet a·dokrangona 0.43% chong·motan 12.78 million-rangsan a·songtangni touristrang re·baaha. Indake ong·genchimoba, India-ni a·paloni sak 2,44,000 touristrang re·baaha, aro ian a·songni dingtang dingtang biaprangona re·bagipa tourisrang chu·gimikoni 1.17% ong·a.
A·palchini tourist-rangni sokbaaoni bang·bataan Meghalaya-ona sokbae 15.4% barianiko nikna man·aha. A·dokni living root bridge, darerang, aro Khasi manderangni dingtangmancha janggi tangani bewalrangchi a·doko dingtangmanchagipa nika-nianirangko on·anio tang·dobaenga. Meghalaya-o ong·telaigipa biaprangni nitoani aro songni-nokni manderangni ku·monge tourism-ko namdapatanirangna kam ka·ani a·selo India-ni a·palchini manderang a·dokona bang·bate re·bana siktokenga ine official-rang janapaha.
A·songtangni tourist-rangni re·baanio 13.4% namdapataniko nikna man·aha. Ian Sohra-o obosta ong·anichi a·dokna namgija bimungko man·ani ja·mano namgipa koborko parakatani ong·a.
Indore-oni tourist-ko so·otani bidingo Meghalaya-na namgija bimungko on·na jotton ka·genchimomangba Sohra-ona bang·a manderangan re·baenga ine koborrangko man·aha. Uandake tourist-rangni sokbaaniko lak 20-ona sokdona ka·dongsoenga.
Global travel app Skyscanner-ni on·gipa ‘Travel Trends Report 2025-o sandie man·ani gitade, a·gilsak gimikoni biap dam 10-ko janapanio India a·songonide Shillongni bimungsan nakataha ine parakataha.
Ia report-ko January 1, 2024 aro June 30 2024-ni gisepo aro 2023 bilsini apsan somoio manderangni biap nina sandigipa flightrango pangchake tariaha. Shillong-ona re·bana flight-rangko sandiani 828% bariaha. Skyscanner-an songre-songgabatanio manderangni jakkalbatgipa app ong·a, aro a·gilsako gimikoni 100 million manderang uni website aro app-ko jaantian jakkalenga.
“Scotland of the East” ine mingsinggipa Shillong, uni nitogipa biaprang, tangsekgipa a·brirang, darerang aro chibolrangchi an·saoata. Ia hill station-ko social media-o namen mingsinga, uandaken a·bri-a·kong dona namnikgiparangko re·bana skata. Sorkari-ni eco-tourism-ko ra·baanichi, samtangtangna chanchibewalgipa manderang Shillong-ona sokbana ska ine ua report-o janapaha.
Meghalaya sorkari, a·dokni dingtang dingtang biaprango, aro mongsongbate tourist-rangni re·ronggipa biaprango manderangna dam-100 paikanarangko rike on·na ra·chakaha. Ru·uta somoirangoni a·dokona re·bagipa tourist-rangna iandakgipa cholrangko on·na man·gijanichi manderangni re·baaniko champenganiko namatna inenba ia kamrangko a·bachengatnasienga.
Na·simang iakoba nina man·gen:
Na·simang iakoba poraina man·gen: Tura-o Durga Puja-ko manina nisengsoe tarisamsoanirangko daka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
