New Delhi, Dec 10: Gisikni chanchianiko noksa sale mesokani, jaktangchi sol·a-repani, sika-koani aro gama-ge·anichi biterangko man·ani gimin Meghalaya a·dokko namen mingsinga. Indake ong·oba, pilakni gita namgniko on·gipa pangchakani bajarrang chu·onga gita donggijanichi jakma-ba·kuni kamrango dingtangmancha sapgipa an·ching Meghalaya a·dokni manderang uamangni tarigipa bosturangni kri namgipa damrango palna cholrangko man·paja ine nikatna man·gen.

‘An·chingni Meghalaya a·doko iandakgipa jakmani kamrango bilongen sapgiparang aro game-ge·e cha·giparangna uamangni ong·katatgipa bosturangko namgipa damrango palna-sim·na cholko on·a gita aro nambata gadango India-ni aroba a·songgipinchini bregiparangna bosturangko palatna man·na gita uamangna pangchakaniko on·na miksonge Meghalayan Age Store’ ba dokan nokko mija Bristibar salo a·songni skotong New Delhi-o Meghalaya-ni skotong minister Pa Conrad K Sangma-ni dongpaanio ma·mongni Textiles and Commerce & Industries-ni minister Pa Piyush Goyal-ni jakchi oprake on·angaha. Ua Store-o, a·dokoni Larnai pottery ba a·aniko tarigipa bosturangoni Ryndia silk ba mugarangona kingking ra·angdame chimonggimin bang·bea dingtang dingtang bosturangko done mesokangaha. Unbaksana, Meghalaya-o game-ge·e man·gipa bosturang jekai mingsinggipa Lakadong Turmeric ba holdi, buringniko man·gipa bija bitchirang aro Sohiong Jam ba acharrangkoba apsansake ua biap pala-sim·aniko dakangjolaha.

Salni tom·anio jinmana aganprakangengon, a·songoni nambatgipa jakmani kamo sapgiparang aro gamgipa-ge·giparang Meghalaya a·dokoniba bang·en gnang, indiba rasong gribee uamangni bimchipani chong·mot biterangko ba bostuna kraa damrangko uamang man·tokjaenga, uni gimin a·dokoni pilak game-ge·e cha·giparang aro jakmani kamrangchi man·gimin bosturangko nambata damrango palna-sim·na cholko on·na re·mikkange ia Meghalayan Age Store-ko a·bachengate on·na gita sorkari ja·kuko de·aha ine a·dokni skotong minister Pa Conrad Sangma parakataha.Ia store-ara Meghalaya-ni manderangna uamangni kamrangchi ong·katatgimin bosturangko aro uamangni changa-sapanirangko a·songni skotongo mesokachi nambata ba krabata damrango brena nangnikgipa manderangna bostuko palatna namgipa cholba ong·gen ineba ua aganangkuaha.

Da·o mikkangchina ja·ku ga·anian bosturangko online gita palani gimin ong·skagen ine aganangengon, “bosturangko online pala-sim·aniko dakanio bang·en ra·bianirangba dongtaia uarangoni mingsara bregiparangona bosturangko sokatanian ong·a. Ua bosturangoni mitamde namen dingtangmanchasa ong·ani gimin jensomoio bajarrango ua bostuni gamchatbataniko nikahaon uamangoni bang·aan bosturangko tarina gita a·bachengen aro online platform-o bosturangko chu·soke palna gita bostu sokataniko baridapatana namen rakgipa kam ong·gen,” ineba ua aganangaha.

Apsandaken, Meghalaya-ni Chief Secretary Ma RV Suchiang-ba uni agananganio, a·dokni pilak jakmatangchi rokkom-rikkit dake tarina changgiparangna aro game-ge·e cha·giparangna ia Meghalayan Age brand-ni gita uamangni man·gimin bosturangko kraa damrango palatna pangchakani cholko on·gen aro iano chu·sokgipa ong·na gita Ateliers Meghalaya Program-ni gita design-rangna aro nangchongmotgipa agan-ku·pattianirangkoba a·dokni pilak changgipa-sapgiparang aro game cha·giparangna on·enga ineba ua agandapataha.

Uandake, Meghalayan Age Ltd.-ni Managing Director aro Chairman aro Tourism and Agriculture Departments, Meghalaya sorkarini Commissioner aro Secretary-ba ong·enggipa Dr. D. Vijay Kumar-ni ia Store-ni gimin agananganio, Delhi-o a·bachengate on·gipa Meghalayan Age Store-ara a·dokni dingtang dingtang dakgiparango man·e cha·aniko, gisikni chanchianiko noksa sale mesokaniko, jakchi sol·a-repaniko, jatni daka-rikaniko, doka-damaniko, sea-jotaniko aroba cha·ani-ringaniko mesokna gita namgipa biap ong·gen ine parakataha.

Store-o donggipa bostu mingprakon, biap, mande badia jat aro sawa ua bostuko tariahachim uni giminba see janapjolani gnang; jechin a·dok-chigako nina-rona re·bagipa ba tourist-rangko Meghalaya a·dokona wenangchina didianiba ong·jolgen ine ua aganangkuaha.

Indake ong·engon, ia Meghalayan Age Store ba dokan nokko a·songni skotong New Delhi, Baba Kharak Singh Road, Connaught Place-ni Rajiv Gandhi Handicrafts Bhavan-ni sambaon rikaha aro ua nokni bimangko, Meghalaya a·doko songdong-a·chachenggipa Khasi, Garo aro Jaintia ia mongsonggipa jat-gittam jatrangni daka-rikanirango bilongen man·e cha·ani bidingo nangchape nitodapate tarijolaha.

Meghalaya Age Ltd., apsandake online gita bosturangko pala-sim·aniko dakna gipin cholko ra·badapani giminba kamrangko ka·enga aro iako re·baenggipa jagni ba jagittamni gisepon a·bachengate on·na ka·dongsoenga. Unbaksana, ia Store-ko India a·songni gipin mongsonggipa songjinmarangonaba sokate dokanko mikkangchi baridapatani giminba kamko ka·na gita miksonganirang gnang.