Shillong, Nov 30:  Meghalayani Governor Pa Satya Pal Malik Brookside Bundalow-o donggipa ‘Rabindranath Tagore’s Art Gallery’-ko nina re·ange Poedo serakgipa aro songsalna dangdike on·anio uphadiko man·pilgipa Rabindranath Tagore-na mande ra·aniko mesokaha. “Brookside Bangalow-ko nina re·angon torom nokona re·a gita daknikpilaha” ine Governor aganaha.

Adita somoirangna skang Meghalaya sorkari Shillong songjinma-o Tagore Cultural Complex-ko dona ine Ministry of Culture-o aganjanapatan baksa iani bidingo A·dokni skotong Minister Pa Conrad K Sangma, Culture and Tourism-ni Union Minister Pa Prahlad Singh-ko grongon, ‘iako dakna Prime Ministerba kusi ong·beenga aro A·dokni Skotong minister baksa iarangni bidingo jakwatgijan kam ka·anggen ine Pa Prahlad kobor-na aganaha.

Chasongsana skang Poedo seanio mingsinggipa aro songsalna dangdike on·anio mingnamgipa Uphadi-ko man·pilgipa Rabindranath Tagore, Assam Meghalaya bak dakna skang shillongona re·baaha aro Brookside Bungalow-o anti gittammang dongangahachim. Ua Bungalow Rilbong-o donga, skango jeon Chittagong-ni Assistant Commissioner Kiran Chandra Dey dongchakachim.