Tura, Oct 04: North Garo Hills a·jani Mendima Deficit Upper Primary School-na skigiparangko nangengani gisepon, School-ni Head Master Pa Nicorson Sangma aro School-ni President Kobilash Sangma aro gipinrang niamko ja·rikgija aro managing committee-ni maming u·irikani gri skulna Assistant teacher-ko kamo rakkiani gimin Sombar salo skul mikkango jinma jegalaniko dakangaha.Iani bidingo koborna seachi u·iatani gitade, kamna rakkiako man⋅giparangni bidingo managing committee mamingkoba u·irikja aro ia mamlako a·jani Deputy Commissioner, District School Education Officer, Director aro Education Minister-na apoti ka⋅anggenchimoba una kraa aganchakaniko man⋅jaengani gimino namnikgijaniko mesokna gita bang·a manderang jripjrip re⋅jomaniko Sombar salo dakangaha.Songni pagiparangoni saksa Pa Mecklister Sangma, iandakgipa kamko raken jegalangenba, songtangonin ia skigipani kamko man⋅na kragipa bi⋅sarang donggenchimoba cholko man·pajanina aro kragija dake kamo rakkianganina an⋅tangni suk ong·gijaniko parakangaha.

Iana agreba, uamangni dabianiko knachakjagenchimode skulko ka⋅na on⋅jawa aro darangkoba skulo napna on·jawa ine mikrakatan baksa, mikkangchi iana bate rakbata ja·kuko de⋅angkugen ine managing committee-oni saksa Pa Elbingstone Shira parakataha.