Williamnagar, Jun 3: Garo Hills-o rubber bikotani kamrangko mangrakbatatna gita Budbar salo, Garo Hills Rubber Producers Society (GHRPS)-ni Group Processing Centre-ko Mendipathar-ni Kawak songo kuliaha.
Ia centre-ko Rubber Board of India-ni Executive Director M Vasanthagesan, kulie on•angaha aro ia centre-ko kulianio, Rubber Production Commissioner Dr Siju T, Joint Director (Production & Quality Control) P Arumugam, Rubber Board-ni gipin official-rang, jolo rubber bagan dake cha•giparang aro gipinrangba dongpae bak ra•angaha.
Ia centre-ko kulina program-ko ong•atanio, GHRPS-ni president M Ch Marak, rimchaksoani kattarangko aganangengon, ia processing centre-ko kulianiara, rubber bagan dake cha•enggiparangni re•mikkanganio mingsa chu•sokani ong•aha aro ian rubber bagan dake cha•enggiparangna pangkamgipa janggi tangani cholko on•aniba ong•enga ine parakataha. Ia jolrango, rubber bagan dake cha•enggiparangna pilak nanga dakchakanirangko on•engani gimin ua Rubber Board of India-koba mittelpilangaha.
Ia centre-ko kulie on•anganio, Rubber Board of India-ni Executive Director M Vasanthagesan-ba jinmana aganprakengon, ia gital centre-ko man•ahani gimin rubber bagan dakenggipa manderangna an•tangni kusi ong•chakaniko parakangenba, ian game ge•e cha•enggiparangna mingsa nambegipa cholko oe on•ani ong•aha ine aganaha.
Rubber-ko tariani dingtang dingtang kamrango invest ka•china ba tangka paisarangko koros ka•china gitaba ua, rubber bagan dakenggipa manderangko didiangaha. Dingtang dingtang cholrangchi, rubber bagan dake cha•enggipa manderangna Rubber Board, dakchakanirangko on•angkugen ineba Vasanthagesan, ku•rachakaniko on•angaha.
Ia program-ko Garo Hills Rubber Producers Society-ni vice president Swins Vincent Manjilla, mittelpilani kattarangko agane matchotataha.
Program matchotani ja•man, Rubber Board of India-ni Joint Director P Arumugam, Hub News baksa agangrikengon, ia sal somoirango ong•telaigipa rubber-ko pilak biaprangon am•tokenga aro a•songo man•enggipa rubber-rangoni 80 percent-kode tyre tarigipa karkanarangna watenga ine parakataha. Rubber bagan dakenggipa manderangna Rubber Board, tangka paisa, nangchongmotgipa ostrorang aro pala sim•anioba dakchakanirangko on•enga ineba ua aganaha.
Ia biapo processing centre-ko kulianichi, rubber bagan dakenggipa manderang, namgipa rubber sheet-rangko bang•en tarina gita cholrangko man•gen ineba Rubber Board official parakataha.
Garo Hills-o rubber bolrangko, dingtang dingtang biaprangosa ge•ani gimin ia processing centre-ara, rubber bagan dakenggipa manderangna, apsan kam ka•rimna cholko on•ani gitaba ong•gen.
Na·simang iakoba nina man·gen:
Na·simang iakoba poraina man·gen: Rel project-ni bidingo manderang baksa agangrikchengna sorkari ku•rachaka
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
