Tura, June 13: Sombar salo, Meghalaya a•dokni Chief Minister Conrad K Sangma, North Tura-ni MLA aro Chief Minister-ni Adviser Thomas A Sangma baksa, Meghalaya a•dok gimikna Payment for Ecosystem Services (PES) Scheme-ko Tura-ni SMELC Building-o a•bachengate on•angaha aro FOCUS program-ni ning•o dingtang dingtang producer group-rangna cheque-rangkoba suale on•angjolaha.
Ia PES scheme-ko a•bachengate on•angani somoio a•dokni Chief Minister, jinmana aganprakengon, ia PES-ni miksonganirangko jinmana talate on•angenba, samtangtango ong•telaigiparangko ripingna aro game ge•e cha•giparangna dakchakanirangko on•na gita ia scheme-ko a•bachengatenga ine parakangaha.
Ia PES scheme-ko a•dokni manderang ra•chaktokenga ine janapatengon, batanggimin bilsibri atani gisepo NPP-chi dilenggipa MDA sorkari, a•doko game ge•e cha•enggipa manderangni janggi tangani gadangko tang•doatna gita dingtang dingtang scheme-rangko bikote on•na man•aha ine Chief Minister parakataha.
Samtangtango ong•telaigiparangko nirokna songtangtango volunteer-rangko donchina songni nokni dilgiparangko didiangengon, ia PES-ni ning•o samtangtango ong•telaigiparangko ripingna gita hectare-prakon gong 15,000 ka•e sorkari dakchakanirangko on•gen aro iana bilsiprakon gong kror 50-ko sorkari chame donenga ine Chief Minister parakataha.
