Tura, June 13: Tura-o nitobatate taridapgipa district auditorium-ko Sombar salo, Meghalaya a•dokni Chief Minister Conrad K Sangma, Tura-ni MP Agatha K Sangma, Chief Minister-ni Adviser Thomas A Sangma, GHADC-ni Chief Executive Membor Albinush R Marak aro gipin dilgiparangni dongpaanio, nokdonggae on•angaha.
Ia apsan somoion a•dokni Chief Minister, New Development Bank-ni dakchakanichi Tura jillani ramarangko taridapna sienggipa project-naba pangchakaniko songe on•angjolaha.
Tura-o gital dake taridapgipa district auditorium-ko nokdonggae on•angani somoio a•dokni Chief Minister Conrad K Sangma, jinmana aganprakangengon, ia auditorium-ko taridapani kamrangko somoi gita matchotate on•ahani gimin nitimenggipa official-rangko aro contractor-rangko mittelpilangaha.
Ia auditorium-ko uni pagipa PA Sangma sagi rike on•ahaoba bilsi 30-na baten ia auditorium-ko maming taridapani gri galchipe donaha ine an•tangni suk ong•gijaniko parakatengon, 2018 bilsio uni sorkari bilona re•baani ja•man ia auditorium-ko taridapna gita skanggipa fong kror 3-ko aro ja•mano gong kror 2 tangkarangko chamdape on•aha ine Chief Minister parakataha.
Ua an•tangba ia auditorium-o uni pantemiting somoirango an•tangni dol baksa gitrangko ring•na cholko man•aha ineba Sangma aganaha.
New Development Bank-ni dakchakanichi a•dok sorkari, Tura Smart Town Project gita dakgipa kamrangko a•bachengataha aro iani ning•o ming 277 road project-rangna a•dok sorkarini chamenggipa gong kror 40-50 tangkarangko man•chape gimik gong kror 55 tangkarangko chamaha ineba ia tom•anio Chief Minister parakataha.
West Garo Hills a•jao gong kror 50-ni State of Art Convention Centre aro Youth Centre Building-koba bakan a•bachengatgnok ineba Chief Minister parakataha.
