Shillong, July 6: Shillong songjinmani Mawdiangdiang-o rikenggipa Meghalaya Legislative Assembly-ni gital nokko matchotangengaha aro da·o mongsonggipa hall-ko matchotatani kamrangsan dongaiaha ine Mongolbar salo Assembly-ni Speaker Metbah Lyngdoh parakataha.
Assembly-ni gital nokko rikani kamrang ta·rakengahani gimin da·o Assembly-ni changgipin session-kode gital Assembly noko ong·atna man·naba gnang ineba ua an·tangni ka·dongchakenganiko parakataha.
Mongolbar salo Assembly Speaker Metbah Lyngdoh-ni kobor ra·timgiparangna parakatani gitade, ia Assembly nokko rikani bidingo ua re·anggipa July-ni 2 tariko tom·e chanchirimangaha aro ia Assembly nokni mongsonggipa hall-na agrede bang·bata kamrangkon matchotmanaha ine ua ma·sina man·aha.
“Ia somoirango sajinmako champengna lockdown-ko ra·gatenganichi kam ka·gipa manderang chu·ongjaengoba kamrangko ta·raken matchotangengaha,” ine Assembly-ni Speaker parakataha.
2022 bilsini Budget Session-ko gital Assembly noko ong·atna man·na gita kamrangko ta·raken matchotatna jotton ka·enga ineba Lyngdoh parakataha.
Meghalaya Legislative Assembly-ni gitcham nokko 2001 bilsio wa·al kamgopaoni da·o bilsi 20 batangpilengahaoba gital building-ko da·onan man·kujaengachim.
Meghalaya a·dokni dingtang dingtang sorkarirang, Assembly-ni gital building-ko rikna gita dingtang dingtang biaprang jekai Police Bazar, Mawdiangdiang, Upper Shillong aro Tara Ghar-ko minge donahaoba da·o ia building-ko Mawdiangdiang-o rikskaengahachim.
