Tura, Feb 24: Meghalaya a•dokni gitcham Home (Prisons) Minister Pa Norwin B Sangma, Budbar walni 10:45 bajimango a•gilsakko watangaha.
Pa Sangma sagi, 1983 bilsio skanggipa changna Assembly election-o susae chegipa ong•aha aro term gnina joljol apsan biapon MLA ong•e ua manderangna dangdike on•angaha. Uni MLA ong•engmiting somoio ua Cabinet-o rimnapako man•e, a•dokni Home (Prisons) Minister ong•angaha.
Pa Sangma sagi, Pa Narayan M Marak aro Ma Nonan B Sangma-ni skanggipa depante aro gnigipa bisarangoni saksa ong•achim. Ua 1938 bilsini April 26 tariko Ampati songo atchiaha. Uamang nokgimik uni bi•samiting somoion Tura songjinmaona Ampati-oni jitbaaha aro primary school-ko Chandmary LP School-o poraie, uni ja•mano Govt multi purpose school-o poraie matric-ko pass kaaha. Ua lekka porana gisik nangbegipa aro lekka man•gipa bi•sa ong•achim. School-o poraimiting somoio ua pagipani printing press-oba kam ka•chapchape dakchake on•aha. Ua matric pass ka•ani ja•mano Guwahati Cotton College-o poraie graduate ong•aha.
Pa Norwin B Sangma, Ma Christnola D Marak-ko bia kaaha aro nokdang ba•ku dake Nokgipa Isol uamangna depante sak 4 aro demechik sak 2-ko pattiaha.
Graduate ong•e re•bapilani ja•man MP school-o ua skigipani kamko ka•chengaha. Uni ja•mano nambata kamko man•e ua skigipani kamko wate Dadenggre Block development officer-ni kamko ka•skaaha. Ua politics-o nape manderangna dangdike on•na sikani gisikba dongachim, uni gimin BDO-ni kamko wate ua MLA-na chakataha aro skanggipa changna 1983 bilsio chakaton ua chegipa ong•aha. Term gnina joljol ua apsan biapon MLA ong•angaha aro Meghalaya Govt-ni home minister ong•e dangdike on•angaha.
Ua uni bon•kamgipa sal somoirango tom•tome noko neng•take demechik su•giparangming somoiko re•ataha. Be•enni bilgrianirangko man•e ua bon•kamgipa somoirango bang•bata somoirangkon palangosa donge re•atna nangaiaha aro bon•kame February 23 tarik attamni 10:45 bajio ua a•gilsakko wate Nokgipaming dongna re•angsoaha.
