Shillong, Feb 19: Meghalaya a·dokni je koela a·damrangon bikote dongimin koelarang dongkuenga, uandakgipa koelarangko dakkie galangkugen ine da·al Sukrobar salo, Meghalaya a·dokni Chief Minister Conrad K Sangma parakataha.
“Adita salrangna skangsan chinga National Green Tribunal (NGT) baksa tom·e agangrikmanaha aro ia tom·anio chinga koelarangni dam komidugaengani giminba chanchirimaha,” ine Sangma aganaha.
Chief Minister-ni parakatani gitade, Coal India Limited (CIL)-ni gita koelana dam tik ka·aniara name komiahani gimin koela cho·enggiparang aro koela nokgiparangsa noksan ong·atako man·skana siengachim.
“Indiba da·o chingni nangnikani gitan NGT, niamko donataha aro koelani damkoba nangani kri bariataha,” ine Sangma parakataha.
NGT-ni gita ra·chakmanahani gimin da·o a·dok sorkari, Meghalaya a·dokni je koela a·damrangon bikotgimin koelarang dongengkua, ia koelarangko dakkie galangkugen ineba Chief Minister parakataha.
