Tura, March 3: Meghalaya a•doko Producer Group-rangko, Service Provider-rangko aro Collective Marketing Centre-rangko bikotna aro sandie kamrangko skie on•na gita Chief Minister-ni Mobilisation Support for Producers program-ko da•al Budbar salo, Meghalaya a•dokni Chief Minister Conrad K Sangma, a•bachengate on•angaha aro ia program-ko ong•atanio North Tura-ni MLA Thomas A Sangma, Williamnagar-ni MLA Marcuise Marak, West aro East Garo Hills a•jani Deputy Commissioner-rang aro dingtang dingtang department-ni officer-rangba dongpae bak ra•angaha.
Meghalaya Livelihoods & Access to Markets Project (Megha-LAMP)-ni ning•o dol 1,260 Producer Group-rangko aro PRIME initiative-ni ning•oba dol 936 Producer Group-rangna sorkari dakchake on•enga aro re•baenggipa jarango Megha-LAMP-ni ning•o donggipa dolrangna gong kror 9.4 tangkarangko aro PRIME-ni ning•o donggipa dolrangna gong kror 6.1 tangkarangko suale on•anggen.
Ia Producer Group-ni membor sakprakan gong 5000/-ko mobilization fund dake man•a aro Service Provider sakprakan gong 50,000-ko mobilisation fund dake man•skaa. Collective Marketing Centre-rangde maming interest gri, gong lak 7 tangkako loan ra•skana man•a.
Tura-o da•al ia Mobilisation Support-ko a•bachengatanio, dol 90 Producer Group-rangna, dol 21 Service Provider-rangna aro dam 38 Collective Marketing Centre-rangna gong kror 3.5-mangko suale on•angaha.
Ia tom•anio Meghalaya a•dokni Chief Minister Conrad Sangma, jinmana aganprakangengon, a•dokna nangchongmotgipa project-rangko ra•gate on•an baksana sorkari, mande sakantini janggi tangani gadangko nambatatna nangenga ine nikenba ja•kuko de•chakataha ine parakataha.
“Onbatgipa gadangonin chinga manderangni janggi tangani gadangko dingtangatna gita chonchone ja•kurangko de•na nangnikenga. Bading chiwalenggiparang, game ge•e cha•enggiparang, kal•susaenggiparang, noksarangko salna changgipa sapgiparang, chatro chatrirang, chadamberang aro uandake dingtang dingtang jakni kamko ka•enggiparang pilakni janggi tanganion dingtanganiko ra•bana gita an•chingo dingtang dingtang chonchongipa cholrang gnang,” ine Chief Minister aganaha.
“Chinga kolgipurangko sandina a•bachengaha aro bading chiwalanian mandeni janggi tanganio pilakni gitan dingtanganiko ra•bana man•gipa ong•a ine chinga nikaha. Chinga bading chiwalgiparangko sandina aro ra•dona a•bachengaha. Anga an•tangba angni janggi tanganio bading chiwalgipa gitasa a•bachengahani gimin bading chiwalgiparangni chagrongna nangenggipa neng•nikanirangko anga ma•sichaka. CM’s Entrepreneurship Recognition Award-ko a•bachengate chinga bading chiwalgiparangko tang•doatna a•bachengaha. Bading chiwalgiparangna rama mesoke on•aniko nangenga ine chinga ma•sienba, skie on•anirangko dakna a•bachengaha aro PRIME Hub-rangkoba chinga a•bachengataha,” ineba Sangma parakataha.
Ia program-ni ning•o Meghalaya sorkari, da•o mikkang bilsi gnini gisepo, game ge•e cha•giparangko aro producer group-rangko tang•doatna gita Meghalaya sorkari gong kror 200-ko jakkalgen ineba ia tom•anio Chief Minister parakataha.
