Shillong, Feb 25: Ia 2026 bilsini January jaona kingking, Meghalaya a•doko sak 10,293-na baten manderang HIV-ko man•e, Antiretroviral Therapy (ART)-ko ra•enga aro ian India a•songo HIV-ko man•giparangoni bang•batgipaba ong•enga.
Meghalaya a•doko iandake HIV/AIDS-ko man•giparang batrorobaengani gimin sabisiko champengna gita miksonganio a•dokni Health Minister Wailadmiki Shylla, bilsi bongani mission-ko a•bachengna gong crore 25-ko Budbar salo parakataha.
Assembly-o Gambegre-ni NPP MLA Mehtab Chandee A Sangma-ni sing•anina aganchakaniko on•angengon, batanggimin bilsi 10-ni gisepo HIV/AIDS-chi bilgriatako man•e sigiparang a•doko sak 749 gapaha aro ianoni sak 435-de East Khasi Hills-o, sak 123-de West Jaintia Hills-o, sak 90-de East Jaintia Hills-o, sak 51-de Ri Bhoi a•jao, sak 16-de Eastern West Khasi Hills-o, sak 8-de West Khasi Hills-o, sak 7-de South West Khasi Hills-o, sak 9-de West Garo Hills-o, sak 4-de East Garo Hills-o, sak 3-de South Garo Hills-o, saksade North Garo Hills-o aro sak 2-de South West Garo Hills a•jao ong•a ine Health Minister parakataha.
Maini gimin sabisiko man•gipa batroroenga ine Mehtab-ni sing•anina aganchakaniko on•angtaiengon, HIV & AIDS (Preventive & Control) Act-o dongimin niam gitade HIV man•giparangni bidingo parakna man•ja aro ua mandeni skani gride uko porikka ra•e nina man•ja aro manderangko sam ringchina dranaba man•ja ine Health Minister aganenba, ian Health department-ni rakbatsranggipa neng•nikani ong•enga ine parakataha.
Manderang mitamde an•tangtangko porikka ra•e nina kratcha•a aro kenani a•selba sabisi man•giparangko ma•sina man•jaenga ineba ua aganaha.
Indake ong•genchimoba, sanna bananirangko on•na aro porikkarangko ra•e nina gita Health department, manderangko didina jotton ka•enga ine Shylla aganaha.
HIV/AIDS-ni giproroaniko champengna gita bilsi bongani mission mode program-ko ra•chakahani gimin ua dingtangmancha a•dokni Chief Minister Conrad K Sangma-koba mittelpilangaha.
Manderangko porikka ra•e nichina aro sanna bananiko ra•china didina gita a•dok sorkari, mondolirang baksa kamrangko ka•engama ine Nongkrem-ni VPP MLA Ardent Basaiawmoit-ni sing•anina aganchakaniko on•angskaengon, manderangna simsak nirokanirangko on•na miksonganion sorkari, bilsi bongani program-na gong crore 25 tangkarangko chamataha aro Chief Minister baksana Assembly Speaker-ni dilanichi Assembly-ni dolsa dilgiparangba apsan tom•e, HIV man•e janggi tangenggiparangna Bolero gari bolsako on•gilataha ine Health Minister aganaha.
Na·simang iakoba nina man·gen:
Na·simang iakoba poraina man·gen: Kaziranga National Park-o skanggipa changna nikronggijagipa Smew ingipa do·oko nika
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
