Shillong, Jan 5: Meghalaya a•dokoba sakbonga manderang Omicron-ko man•ahani gimin lockdown-ko ra•gattainaba gnang ine manderang kenjagoktokengon, da•o dipet Meghalaya a•doko lockdown-ko ra•gatkujawa ine Budbar salo, a•dokni Deputy Chief Minister Prestone Tynsong parakataha.
A•doko Omicron rokomko man•giparang dongahaoba iana kenjagokjachina aro an•tangtangni namgnina sorkarini ra•gatgipa niamrangko ja•rikchina gitaba ua a•dokni manderangko didiangaha.
Corona jo•ongrangara da•o dongkamnagipa ong•ahani gimin manderang ia sabisi baksa janggi tangna skie ra•na nanggnok aro bilsignina skang ra•gatgipa niamrangko ja•rikjringna nanggnok ineba Tynsong aganaha.
COVID-19-ni ia gital Omicron rokomara inditana nangchakeaniko on•gipa ong•ja aro a•doko Omicron man•gipa sakbonga manderangba da•o namen dongenga ineba ua ia sabisina kenjagokjachina gita manderangko didiangaha.
Deputy Chief Minister-ni parakatani gitade, batanggimin bilsignini gisepo a•dokni manderang bang•en neng•nikanirangko man•tokna nangahani gimin lockdown-ko ra•gatanide bon•kamgipa cholsa ong•aigen.
Meghalaya a•doko gittamgipa changna COVID-ni giproroaniko warachakna gita a•dok sorkario chu•onga gitan cholrang donga ineba Tynsong parakataha.
Bilsi 15-oni bilsi 18 ong•gipa chadamberangnaba COVID-ni tikako re•anggipa January 3 tarikonin su•engahani gimin tika su•kugijagipa pilak manderangkon su•e ra•china gitaba Tynsong didiataha.
